മാറ്റയുടെ ക്ലബ്ബിന് മാറ്റമില്ല, യുണൈറ്റഡിൽ പുത്തൻ കരാർ ഒപ്പിട്ടു

മാഞ്ചസ്റ്റർ യുണൈറ്റഡിന്റെ സ്പാനിഷ് മധ്യനിര താരം ഹുവാൻ മാറ്റ ക്ലബ്ബ്മായി പുതിയ കരാറിൽ ഒപ്പു വച്ചു. കരാർ പ്രകാരം 2021 വരെ താരം ഓൾഡ് ട്രാഫോഡിൽ തുടരും. ഈ മാസം അവസാനത്തോടെ കരാർ അവസാനിക്കുമായിരുന്ന താരത്തെ അവസാന നിമിഷമാണ്‌ പുതിയ കരാർ നൽകി യുണൈറ്റഡ് നിലനിർത്തിയത്.

31 വയസ്സുകാരനായ മാറ്റ 2014 ലാണ് ചെൽസിയിൽ നിന്ന് യുണൈറ്റഡിൽ എത്തുന്നത്. ക്ലബ്ബിനോപ്പം യൂറോപ്പ ലീഗ്, എഫ് എ കപ്പ്, ലീഗ് കപ്പ്, കിരീടങ്ങൾ നേടിയ താരം 41 തവണ സ്‌പെയിൻ ദേശീയ ടീമിന് വേണ്ടിയും ബൂട്ട് കെട്ടി. 2010 ൽ ലോകകപ്പ് നേടിയ ടീമിലും 2012 ൽ യൂറോ കപ്പ് നേടിയ ടീമിലും അംഗമായി. 2012 ൽ ചെൽസി ചാമ്പ്യൻസ് ലീഗ് നേടിയപ്പോഴും ടീമിലെ പ്രധാന താരമായിരുന്നു മാറ്റ.

യൂണിറ്റഡിനായി 218 കളികളിൽ ഇറങ്ങിയ താരം 45 ഗോളുകളും സ്വന്തം പേരിൽ കുറിച്ചു.