പ്രീമിയർ ലീഗിൽ ലിവർപൂൾ അപരാജിത കുതിപ്പ് തുടരുന്നു. വാട്ട്ഫോഡിന്റെ മൈതാനത്ത് അവരെ എതിരില്ലാത്ത 3 ഗോളുകൾക്ക് മറികടന്ന ക്ളോപ്പും സംഘവും ലീഗിൽ കിരീട പോരാട്ടത്തിൽ പിറകിലേക്ക് ഇല്ലെന്ന പ്രഖ്യാപനം നടത്തുന്ന പ്രകടനമാണ്‌ നടത്തിയത്. ജയത്തോടെ 13 മത്സരങ്ങളിൽ നിന്ന് 33 പോയിന്റുമായി സിറ്റിക്ക് കേവലം 2 പോയിന്റ് പിറകിലായി രണ്ടാം സ്ഥാനത്താണ് അവർ.
മത്സരത്തിൽ ഉടനീളം ആധിപത്യം പുലർത്തിയ ലിവർപൂളിന് പക്ഷെ ആദ്യ ഗോളിനായി അൽപം കാത്തിരിക്കേണ്ടി വന്നു. ആദ്യ പകുതിയിൽ അവർക്ക് ഗോളൊന്നും നേടാനായില്ല. പക്ഷെ രണ്ടാം പകുതിയിൽ മാനെയുടെ പാസിൽ നിന്ന് സലാഹ് ഗോൾ നേടി അവരെ മുന്നിലെത്തിച്ചു. പിന്നീട് ഫിർമിനോയെ വീഴ്ത്തിയതിന് ലഭിച്ച ഫ്രീകിക്ക് ഗോളാക്കി അലക്‌സാണ്ടർ അർണോൾഡ് ലീഡ് രണ്ടാകുകയായിരുന്നു. കളി തീരാൻ മിനുട്ടുകൾ മാത്രം ശേഷിക്കെ ഫിർമിനോയാണ് ലിവർപൂളിന്റെ മൂന്നാം ഗോൾ നേടിയത്. മത്സരത്തിന്റെ 82 ആം മിനുട്ടിൽ ലിവർപൂൾ ക്യാപ്റ്റൻ ഹെൻഡേഴ്‌സൺ ചുവപ്പ് കാർഡ് കണ്ട് പുറത്തായിരുന്നു.
