പ്രീമിയർ ലീഗിൽ നിന്ന്തരം താഴ്ത്തപ്പെട്ടതിന് പിന്നാലെ ലെസ്റ്ററിനോട് കനത്ത തോൽവിയേറ്റുവാങ്ങി ഹഡേർസ്ഫീൽഡ്. ഇന്ന് സ്വന്തം ഗ്രൗണ്ടിൽ നടന്ന മത്സരത്തിൽ ഒന്നിനെതിരെ നാല് ഗോളുകൾക്കാണ് ഹഡേർസ്ഫീൽഡ് ലെസ്റ്ററിനോട് തോറ്റത്. ലെസ്റ്ററിന് വേണ്ടി ഇരട്ട ഗോൾ നേടിയ ജാമി വാർഡിയാണ് തിളങ്ങിയത്. തുടക്കം മുതൽ മത്സരത്തിൽ പൂർണ ആധിപത്യം പുലർത്തിയ ലെസ്റ്റർ ടിലെമൻസിന്റെ ഗോളിൽ ആദ്യ പകുതിയിൽ തന്നെ മുൻപിലെത്തി.
തുടർന്ന് രണ്ടാം പകുതിയുടെ തുടക്കത്തിൽ തന്നെ വാർഡിയിലൂടെ ലെസ്റ്റർ രണ്ടാമത്തെ ഗോളും നേടി. എന്നാൽ മത്സരത്തിന്റെ 52ആം മിനുട്ടിൽ ലഭിച്ച പെനാൽറ്റി ഗോളാക്കി മോയ് ഹഡേർസ്ഫീൽഡിന് നേരിയ പ്രതീക്ഷ നൽകിയെങ്കിലും 79ആം മിനുറ്റിൽ മാഡിസണും 84 മിനുറ്റിൽ പെനാൽറ്റിയിലൂടെ വാർഡിയും ഗോൾ നേടി ലെസ്റ്ററിന്റെ ഗംഭീര വിജയമുറപ്പിച്ചു. ജയത്തോടെ വാറ്റ്ഫോർഡിനെയും വോൾവ്സിനെയും മറികടന്ന് ലെസ്റ്റർ പോയിന്റ് പട്ടികയിൽ ഏഴാം സ്ഥാനത്തെത്തി.
