യുവതാരം മേസൺ ഗ്രീൻവുഡ് മാഞ്ചസ്റ്റർ യുണൈറ്റഡ് നീണ്ട കാലത്തിനു ശേഷം ഫുട്ബോൾ പരിശീലനം പുനരാരംഭിച്ചു. താരം ഇന്നലെ പബ്ലിക് സ്പോർട്സ് സെന്ററിൽ പരിശീലനത്തിന് എത്തിയ ചിത്രങ്ങൾ സൺ പങ്കുവെച്ചു. താരം കഴിഞ്ഞ ജനുവരിയിൽ അറസ്റ്റ് ചെയ്യപ്പെട്ട ശേഷം ഇതാദ്യമായാണ് പരസ്യമായി ഫുട്ബോൾ പരിശീലനത്തിന് എത്തുന്നത്. അടുത്ത സീസണോടെ ഗ്രീൻവുഡ് ഫുട്ബോൾ പുനരാരംഭിക്കും എന്നാണ് ഇപ്പോൾ പ്രതീക്ഷിക്കപ്പെടുന്നത്.
മാഞ്ചസ്റ്റർ യുണൈറ്റഡ് അടുത്ത സീസണായി നിലനിർത്തിയ താരങ്ങളുടെ പട്ടികയിൽ ഗ്രീൻവുഡ് ഇടം നേടിയിരുന്നു. ഗ്രീൻവുഡിന് മാഞ്ചസ്റ്റർ യുണൈറ്റഡിൽ ഇനിയും മൂന്ന് വർഷത്തെ കരാറും ഉണ്ട്. എങ്കിലും താരം അടുത്ത സീസണിൽ യുണൈറ്റഡിനായി കളിക്കുമോ എന്ന കാര്യത്തിൽ ഇതുവരെ ഒരു തീരുമാനവും ക്ലബ് എടുത്തിട്ടില്ല.
ഗ്രീൻവുഡിന്റെ വിഷയത്തിൽ മാഞ്ചസ്റ്റർ യുണൈറ്റഡ് നടാനടാത്തിവന്നിരുന്ന ആഭ്യന്തരമായ അന്വേഷണം പൂർത്തിയായിട്ടുണ്ട്. താരം ക്ലബിൽ തുടരണോ വേണ്ടയോ എന്നത് പെട്ടെന്ന് തന്നെ തീരുമാനിച്ച് ക്ലബ് ഔദ്യോഗികമായി ആരാധകരെ അറിയിക്കും എന്നാണ് റിപ്പോർട്ടുകൾ.
ഗ്രീൻവുഡിന്റെ മുൻ കാമുകി അവരെ ഗ്രീൻവുഡ് ശാരീരികമായി പീഡിപ്പിക്കുന്ന വീഡിയോകളും ചിത്രങ്ങളും പോസ്റ്റ് ചെയ്തതിനെ തുടർന്ന് താരത്തെ ക്ലബ്ബ് 2022 ജനുവരിയിൽ സസ്‌പെൻഡ് ചെയ്തിരുന്നു. ഗ്രീൻവുഡിനെ പോലീസ് അറസ്റ്റ് ചെയ്യുകയും പിന്നീട് ജാമ്യത്തിൽ വിട്ടയക്കുകയും ചെയ്തു. എന്നിരുന്നാലും, ഈ വർഷം ആദ്യം മാഞ്ചസ്റ്റർ പോലീസ് ഗ്രീന്വുഡിനെ എല്ലാ കുറ്റങ്ങളിൽ നിന്നും ഒഴിവാക്കി.
ഗ്രീൻവുഡിനെ ടീമിലേക്ക് തിരികെ കൊണ്ടുവരുന്നത് സംബന്ധിച്ച് രണ്ട് അഭിപ്രായങ്ങൾ ആണ് ആരാധകർക്ക് ഇടയിൽ ഇപ്പോഴും ഉള്ളത്. ഗ്രീൻവുഡ് മികച്ച താരമാണ് എന്നും എന്നാൽ ഗ്രീൻവുഡിനെ ടീമിലേക്ക് തിരികെ എടുക്കണോ എന്നത് ക്ലബ് ആണ് തീരുമാനിക്കേണ്ടത് താൻ അല്ല എന്ന് യുണൈറ്റഡ് പരിശീലകൻ ടെൻഹാഗ് കഴിഞ്ഞ മാസം പറഞ്ഞിരുന്നു.
