പ്രീമിയർ ലീഗിൽ ഏറ്റവും കൂടുതൽ ഗോൾ നേടിയ അലൻ ഷിയററുടെ റെക്കോർഡ് തകർക്കാൻ മാഞ്ചസ്റ്റർ സിറ്റി താരം അഗ്വേറോക്ക് സാധിക്കുമെന്ന് മാഞ്ചസ്റ്റർ സിറ്റിയിൽ അഗ്വേറോയുടെ സഹ താരമായ ബെർണാർഡോ സിൽവ. പ്രീമിയർ ലീഗിൽ 260 ഗോളുകൾ നേടിയ അലൻ ഷിയററുടെ പേരിലാണ് ഏറ്റവും കൂടുതൽ ഗോൾ നേടിയ റെക്കോർഡ്. അഗ്വേറോ അത് മറികടക്കുമെന്നാണ് ബെർണാർഡോ സിൽവ കരുതുന്നത്
കഴിഞ്ഞ ദിവസം ബേൺലിക്കെതിരെ ഗോൾ നേടിയ അഗ്വേറോ ന്യൂ കാസിലിനു വേണ്ടി 148 ഗോൾ നേടിയ ഷിയററുടെ റെക്കോർഡിനൊപ്പം എത്തിയിരുന്നു. ഒരു ക്ലബിന് വേണ്ടി കൂടുതൽ ഗോൾ നേടുന്ന ഷിയററുടെ റെക്കോർഡിനൊപ്പമാണ് അഗ്വേറോ എത്തിയത്. അതെ സമയം ഒരു ക്ലബിന് വേണ്ടി ഏറ്റവും കൂടുതൽ ഗോൾ നേടിയ റെക്കോർഡ് മാഞ്ചസ്റ്റർ യുണൈറ്റഡിന് വേണ്ടി 183 ഗോളുകൾ നേടിയ റൂണിയുടെ പേരിലാണ്. റൂണിയെ കൂടാതെ ആഴ്‌സണൽ ഇതിഹാസം തിയറി ഹെൻറിയാണ് അഗ്വേറോക്ക് മുൻപിൽ ഇനിയുള്ളത്.
30 കാരനായ അഗ്വേറോ അടുത്താണ് മാഞ്ചെസ്റ്റെർ സിറ്റിയിൽ കരാർ പുതുക്കിയത്. 2011ൽ അത്ലറ്റികോ മാഡ്രിഡിൽ നിന്ന് മാഞ്ചസ്റ്റർ സിറ്റിയിൽ എത്തിയ അഗ്വേറോ പുതിയ കരാർ പ്രകാരം 2021 വരെ സിറ്റിയിൽ തുടരും. കഴിഞ്ഞ നാല് സീസണിലും പ്രീമിയർ ലീഗിൽ 20ൽ കൂടുതൽ ഗോൾ നേടാൻ അഗ്വേറോക്ക് കഴിഞ്ഞിട്ടുണ്ട്.
