പരിശീലകനെ പുറത്താക്കി വോൾവ്സ്

ഇംഗ്ലീഷ് പ്രീമിയർ ലീഗിൽ മോശം തുടക്കത്തിന് പിന്നാലെ പരിശീലകൻ വിറ്റർ പെരേരയെ പുറത്താക്കി വോൾവ്സ്. ലീഗിൽ ഇത് വരെ 10 കളികളിൽ നിന്നു ഒരൊറ്റ മത്സരവും ജയിക്കാൻ ആവാത്ത വോൾവ്സ് വെറും 2 പോയിന്റും ആയി അവസാന സ്ഥാനത്ത് ആണ്. പ്രീമിയർ ലീഗിൽ കഴിഞ്ഞ 14 കളികളിൽ ജയിക്കാൻ അവർക്ക് ആയിട്ടില്ല. കഴിഞ്ഞ സീസണിൽ ഡിസംബറിൽ ആണ് ഗാരി ഒ’നെയിലിന് പകരക്കാരനായി ആണ് പെരേര വോൾവ്സ് പരിശീലകൻ ആയി എത്തിയത്. തുടർന്ന് ടീമിനെ തരം താഴ്ത്തലിൽ നിന്നു രക്ഷിക്കാൻ ആയ പരിശീലകനു പക്ഷെ ഈ സീസണിൽ അടിതെറ്റി.

പ്രമുഖ താരങ്ങൾ ക്ലബ് വിട്ടതും പരിശീലകനു തിരിച്ചടിയായി. ആരാധകരുടെ വലിയ പ്രതിഷേധത്തിന് ഇടയിലും സെപ്റ്റംബറിൽ പരിശീലകന്റെ കരാർ വോൾവ്സ് 3 വർഷത്തേക്ക് കൂടി നീട്ടിയിരുന്നു. എന്നാൽ തുടരുന്ന മോശം പ്രകടനം പരിശീലകന്റെ ജോലി തെറിപ്പിക്കുക ആയിരുന്നു. ഇന്നലെ ഫുൾഹമിനോട് 3-0 നു തോറ്റതിനു പിന്നാലെയാണ് വോൾവ്സ് പ്രഖ്യാപനം ഇന്നുണ്ടായത്. നിലവിൽ അണ്ടർ 21, അണ്ടർ 19 പരിശീലകർ ആവും വോൾവ്സിന്റെ പരിശീലനത്തിൽ മേൽനോട്ടം വഹിക്കുക. ലീഗിൽ നിന്നു തരം താഴ്ത്തൽ ഒഴിവാക്കാൻ വോൾവ്സ് ആരെ പരിശീലകൻ ആയി കൊണ്ടു വരും എന്ന കാര്യം നിലവിൽ വ്യക്തമല്ല.