ന്യൂകാസിൽ: എസി മിലാൻ പ്രതിരോധ താരം മാലിക് തിയാവിനെ ന്യൂകാസിൽ യുണൈറ്റഡ് സ്വന്തമാക്കി. ഏകദേശം 40 ദശലക്ഷം യൂറോയുടെ കരാറിലാണ് ജർമ്മൻ താരം ന്യൂകാസിലിലെത്തുന്നത്. എസി മിലാൻ കരാറിന് വാക്കാൽ സമ്മതം മൂളിയതോടെ കൈമാറ്റം അന്തിമഘട്ടത്തിലാണ്.
24-കാരനായ തിയാവ്, ചാമ്പ്യൻസ് ലീഗിൽ കളിക്കാനുള്ള അവസരത്തിൽ ആകൃഷ്ടനായാണ് ഇംഗ്ലീഷ് ക്ലബ്ബിലേക്ക് എത്തുന്നത്. സ്വെൻ ബോട്ട്മാൻ ഒഴികെ പ്രതിരോധനിരയിലെ പ്രമുഖ താരങ്ങളുടെ പരിക്കും പ്രായക്കൂടുതലും ന്യൂകാസിലിന് തലവേദനയായിരുന്നു. ഈ സാഹചര്യത്തിൽ തിയാവിന്റെ വരവ് പ്രതിരോധനിരയ്ക്ക് പുതിയ ഊർജ്ജം നൽകുമെന്നാണ് കരുതുന്നത്.
മെഡിക്കൽ പരിശോധനകൾക്ക് ശേഷം എഡ്ഡി ഹൗവിന്റെ ടീമിന്റെ പ്രതിരോധത്തിലെ പുതിയ മുഖമാകും തിയാവ്.
ഷാൽക്കെയിൽ തിളങ്ങിയ തിയാവ് എസി മിലാനിൽ തന്റെ സ്ഥാനം ഉറപ്പിച്ചിരുന്നു. 2022-ൽ 8.8 ദശലക്ഷം യൂറോയ്ക്ക് എസി മിലാൻ സ്വന്തമാക്കിയ താരത്തെയാണ് ഇപ്പോൾ 40 ദശലക്ഷം യൂറോ നൽകി ന്യൂകാസിൽ സ്വന്തമാക്കുന്നത്.
