ലിവർപൂളിന്റെ പ്രതിരോധനിരയിലേക്ക് ഇറ്റാലിയൻ യുവതാരം ജിയോവാനി ലിയോണി എത്തുന്നു. പാർമയിൽ നിന്ന് 35 മില്യൺ യൂറോയ്ക്കാണ് 18-കാരനായ ഈ സെന്റർ ബാക്കിനെ ലിവർപൂൾ സ്വന്തമാക്കുന്നത്. യൂറോപ്പിലെ ഏറ്റവും മികച്ച യുവപ്രതിരോധ താരങ്ങളിൽ ഒരാളായി വിലയിരുത്തപ്പെടുന്ന ലിയോണി, പുതിയ സീസണിൽ ആർനെ സ്ലോട്ടിന്റെ പദ്ധതികളിലെ നിർണായക താരമാകും.
ഭാവിയിലേക്കുള്ള ലിവർപൂളിന്റെ വലിയ നിക്ഷേപമായാണ് ഈ നീക്കം വിലയിരുത്തപ്പെടുന്നത്. കഴിഞ്ഞ സീസണിൽ പാർമയ്ക്കായി 17 സീരി എ മത്സരങ്ങളിൽ കളിച്ച ലിയോണി, ലിവർപൂളിൽ ചേരാൻ ഏറെ താൽപ്പര്യം കാണിച്ചിരുന്നു. ഇറ്റലിയിലെയും ഇംഗ്ലണ്ടിലെയും പ്രമുഖ ക്ലബ്ബുകൾ താരത്തിനായി രംഗത്തുണ്ടായിരുന്നെങ്കിലും ലിവർപൂളിന്റെ ദീർഘവീക്ഷണവും യുവതാരങ്ങളിലുള്ള പരിശീലകൻ സ്ലോട്ടിന്റെ വിശ്വാസവുമാണ് ഈ കൈമാറ്റം യാഥാർത്ഥ്യമാക്കിയത്.
ലിയോണിയെ ലോണിന് വിടില്ലെന്നും, ഉടൻ തന്നെ സീനിയർ ടീമിനൊപ്പം ചേർക്കുമെന്നും ക്ലബ് സൂചന നൽകുന്നു.
