ലിവർപൂളിന് ആശ്വാസം, ഇസാക് പരിശീലനം പുനരാരംഭിച്ചു

ശനിയാഴ്ച ആൻഫീൽഡിൽ നടക്കാനിരിക്കുന്ന ചെൽസിക്കെതിരായ പ്രീമിയർ ലീഗ് പോരാട്ടത്തിന് മുൻപ് സ്ട്രൈക്കർ അലക്സാണ്ടർ ഇസാക്കിന്റെ കായികക്ഷമതയെക്കുറിച്ചുള്ള ആശങ്കയിലാണ് ലിവർപൂൾ പരിശീലകൻ ആർനെ സ്ലോട്ട്. ഗ്രോയിൻ പരിക്കിനെത്തുടർന്ന് മാഞ്ചസ്റ്റർ യുണൈറ്റഡിനെതിരായ കഴിഞ്ഞ മത്സരം ഇസാക്കിന് നഷ്ടമായിരുന്നു. ഇന്നലെ ഭാഗികമായി പരിശീലനത്തിന് ഇറങ്ങിയ താരം ഇന്ന് പൂർണ്ണമായി പങ്കെടുക്കുമോ എന്നതിനെ ആശ്രയിച്ചിരിക്കും അദ്ദേഹത്തിന്റെ കളിക്കളത്തിലേക്കുള്ള മടക്കം. നിലവിൽ 58 പോയിന്റോടെ നാലാം സ്ഥാനത്തുള്ള ലിവർപൂളിന് ചാമ്പ്യൻസ് ലീഗ് യോഗ്യത ഉറപ്പാക്കാൻ ഈ വിജയം അത്യന്താപേക്ഷിതമാണ്.

ഇസക്കിന്റെ കാര്യത്തിൽ പ്രതീക്ഷയുണ്ടെങ്കിലും ഗോൾകീപ്പർ അലിസണും സൂപ്പർ താരം മുഹമ്മദ് സലായും പരിക്കിനെത്തുടർന്ന് പുറത്തായിരിക്കുന്നത് ടീമിന് വലിയ തിരിച്ചടിയാണ്. ഇരുവരെയും അലട്ടുന്ന ഹാംസ്ട്രിംഗ് പരിക്കുകൾ ഇതുവരെ ഭേദമായിട്ടില്ല. താൽക്കാലിക പരിശീലകൻ കലം മക്ഫാർലെയ്‌ന്റെ കീഴിൽ തുടർച്ചയായ ആറ് മത്സരങ്ങളിൽ പരാജയപ്പെട്ട ചെൽസിയെയാണ് ലിവർപൂൾ നേരിടുന്നത്. എങ്കിലും ചെൽസിയെ കുറച്ചുകാണരുതെന്ന് ആർനെ സ്ലോട്ട് മുന്നറിയിപ്പ് നൽകി.