പി.എസ്.ജി താരങ്ങളായ തിയാഗോ സിൽവ, ചൗപോ മോട്ടിങ്, സെർജിയോ റിക്കോ എന്നിവർ ഈ സീസൺ അവസാനം വരെ പി.എസ്.ജിയിൽ തുടരും. സീസൺ അവസാനിക്കുന്നത് വരെ പി.എസ്.ജിയിൽ തുടരാനുള്ള കരാറിൽ താരങ്ങൾ ഏർപെട്ടതായി പി.എസ്.ജി വ്യക്തമാക്കി. ജൂൺ 30ന് താരങ്ങളുടെ കരാർ പി.എസ്.ജിയിൽ അവസാനിക്കാനിരിക്കെയാണ് താരങ്ങൾ ഈ സീസൺ മുഴുവൻ ടീമിനൊപ്പം ഉണ്ടാവുമെന്ന് പി.എസ്.ജി അറിയിച്ചത്.
കൊറോണ വൈറസ് ബാധയെ തുടർന്ന് നേരത്തെ ലീഗ് 1 അവസാനിപ്പിച്ച് പി.എസ്.ജിയെ ഫ്രാൻസിലെ ചാമ്പ്യന്മാരായി പ്രഖ്യാപിച്ചിരുന്നു. എന്നാൽ ഫ്രാൻസിലെ ആഭ്യന്തര ടൂർണമെന്റുകളായ കോപ്പ ഡി ഫ്രാൻസും കോപ്പ ഡി ല ലിഗ ജൂലൈ അവസാനം വാരം നടക്കുമെന്ന് അറിയിച്ചതിനെ തുടർന്നാണ് കരാർ കാലാവധി കഴിഞ്ഞ താരങ്ങളുടെ കരാർ പി.എസ്.ജി നീട്ടിയത്. കോപ്പ ഡി ഫ്രാൻസ് ജൂലൈ 24നും കോപ്പ ഡി ല ലിഗ ജൂലൈ 31നും നടക്കുമെന്ന് ഫ്രഞ്ച് ഫുട്ബോൾ അസോസിയേഷൻ വ്യക്തമാക്കിയിട്ടുണ്ട്.
കൂടാതെ പി.എസ്.ജിക്ക് ഈ സീസണിൽ ചാമ്പ്യൻസ് ലീഗ് മത്സരങ്ങൾ കൂടി ബാക്കിയിട്ടുണ്ട്. ലിസ്ബണിൽ വെച്ചാവും പി.എസ്.ജിയുടെ ബാക്കി ചാമ്പ്യൻസ് ലീഗ് മത്സരങ്ങൾ നടക്കുക.
