സ്പാനിഷ് ലാ ലീഗയിൽ ആദ്യ പരാജയം ഏറ്റുവാങ്ങി അത്ലറ്റികോ മാഡ്രിഡ്. സ്വന്തം മൈതാനത്ത് വലൻസിയ ആണ് അത്ലറ്റികോയെ എതിരില്ലാത്ത 3 ഗോളുകൾക്ക് തോൽപ്പിച്ചത്. മത്സരത്തിൽ കുറവ് നേരം പന്ത് കൈവശം വച്ചെങ്കിലും കൂടുതൽ അവസരങ്ങൾ വലൻസിയ ആണ് ഉണ്ടാക്കിയത്. മത്സരത്തിൽ അഞ്ചാം മിനിറ്റിൽ മുൻ റയൽ മാഡ്രിഡ് അക്കാദമി താരം ഹ്യൂഗോ ഡുരോ വലൻസിയക്ക് ആയി ആദ്യ ഗോൾ സമ്മാനിച്ചു.
34 മത്തെ മിനിറ്റിൽ ഫ്രാൻ പെരസിന്റെ പാസിൽ നിന്നു തന്റെ രണ്ടാം ഗോൾ നേടിയ ഹ്യൂഗോ ഡുരോ അത്ലറ്റികോക്ക് അടുത്ത അടി നൽകി. രണ്ടാം പകുതിയിൽ 54 മത്തെ മിനിറ്റിൽ തിയറി കൊരെയ്രയുടെ പാസിൽ നിന്നു ഗോൾ നേടിയ ഹാവി ഗുയെരോ വലൻസിയ ജയം ഉറപ്പിക്കുക ആയിരുന്നു. ജയത്തോടെ വലൻസിയ അഞ്ചാം സ്ഥാനത്തേക്ക് കയറിയപ്പോൾ അത്ലറ്റികോ മാഡ്രിഡ് നിലവിൽ ലീഗിൽ ഏഴാം സ്ഥാനത്ത് ആണ്.
