കേരള പ്രീമിയർ ലീഗിൽ ഇനിയും രണ്ട് മത്സരങ്ങൾ ബാക്കിയിരിക്കെ തന്നെ ഗോകുലം കേരള എഫ് സി സെമി ഉറപ്പിച്ചു. ഇന്ന് ലീഗിലെ തുടർച്ചയായ ആറാം വിജയത്തോടെയാണ് ഗോകുലം കേരള എഫ് സി സെമി ഫൈനൽ ഉറപ്പിച്ചത്. ഗ്രൂപ്പിലെ ആദ്യ രണ്ടു സ്ഥാനക്കാരാണ് സെമിയിലേക്ക് കടക്കുക. ഇന്നത്തെ ജയത്തോടെ ഗോകുലം ആദ്യ രണ്ട് സ്ഥാനങ്ങളിൽ എത്തും എന്ന് ഉറപ്പായി.
ഇന്ന് കോഴിക്കോട് ഇ എം എസ് സ്റ്റേഡിയത്തിൽ നടന്ന മത്സരത്തിൽ ഷൂട്ടേഴ്സ് പടന്നയെ ആണ് ഗോകുലം തോൽപ്പിച്ചത്. ഒന്നിനെതിരെ രണ്ടു ഗോളുകൾക്കായിരുന്നു ഗോകുലത്തിന്റെ വിജയം. ഇഞ്ച്വറി ടൈമിൽ സബാ നേടിയ ഗോളാണ് ഗോകുലത്തിന് വിജയം നൽകിയത്. ആദ്യ പകുതിയിൽ ഷിഹാദ് നേടിയ ഗോളിൽ ഗോകുലം മുന്നിൽ എത്തിയതായിരുന്നു. എന്നാൽ 75ആം മിനുട്ടിൽ വിഷ്ണുവിന്റെ ഗോളിലൂടെ സമനില പിടിക്കാൻ ഷൂട്ടേഴ്സിനായി. അതിനു ശേഷമായിരുന്നു സബായുടെ ഗോൾ.
ആറിൽ ആറു ജയത്തോടെ 18 പോയന്റുമായി ഗോകുലം കേരള എഫ് സി ഗ്രൂപ്പ് ബിയിൽ ഒന്നാമത് നിൽക്കുകയാണ്. ഷൂട്ടേഴ്സിന്റെ ലീഗിലെ രണ്ടാം തോൽവിയാണിത്.
