റിയാദ്: സൗദി പ്രോ ലീഗ് ക്ലബ്ബായ അൽ-നസറിന്റെ പരിശീലകനായി പോർച്ചുഗീസ് പരിശീലകൻ ജോർജ് ജെസ്യൂസ് ഉടൻ ചുമതലയേൽക്കുമെന്ന് റിപ്പോർട്ടുകൾ. ക്ലബ്ബുമായി ഒരു വർഷത്തെ കരാറിൽ ജെസ്യൂസ് ധാരണയിലെത്തിയതായാണ് സൂചന. മുൻ പരിശീലകൻ സ്റ്റെഫാനോ പിയോളി ക്ലബ് വിട്ടതിന് പിന്നാലെയാണ് അൽ-നസർ പുതിയ പരിശീലകനായുള്ള നീക്കങ്ങൾ വേഗത്തിലാക്കിയത്.
കഴിഞ്ഞ സീസണിൽ അൽ-നസറിനെ പരിശീലിപ്പിച്ചിരുന്ന സ്റ്റെഫാനോ പിയോളി അടുത്തിടെയാണ് ക്ലബ്ബുമായുള്ള ബന്ധം വേർപെടുത്തിയത്. സീരി എ ക്ലബ്ബായ ഫിയോറന്റീനയുടെ പരിശീലകനായി പിയോളി ചുമതലയേൽക്കുമെന്നാണ് പ്രതീക്ഷിക്കുന്നത്. ക്രിസ്റ്റ്യാനോ റൊണാൾഡോ ഉൾപ്പെടെയുള്ള സൂപ്പർ താരങ്ങളുണ്ടായിട്ടും കഴിഞ്ഞ സീസണിൽ കാര്യമായ കിരീടനേട്ടങ്ങളൊന്നും അൽ-നസറിന് സ്വന്തമാക്കാൻ സാധിച്ചിരുന്നില്ല.
അൽ-ഹിലാൽ ഉൾപ്പെടെയുള്ള സൗദി ക്ലബ്ബുകളെ പരിശീലിപ്പിച്ച് മികച്ച റെക്കോർഡുകളുള്ള പരിശീലകനാണ് ജോർജ് ജെസ്യൂസ്. സൗദി ഫുട്ബോളിനെക്കുറിച്ച് നല്ല ധാരണയുള്ള അദ്ദേഹത്തിന്റെ വരവ് അൽ-നസറിന് പുതിയ ഉണർവ് നൽകുമെന്നാണ് ആരാധകർ പ്രതീക്ഷിക്കുന്നത്. അടുത്ത ആഴ്ചയോടെ ഔദ്യോഗിക പ്രഖ്യാപനം ഉണ്ടാകുമെന്നാണ് കരുതുന്നത്.
