ഏഷ്യൻ കപ്പ് തുടർച്ചയായ രണ്ടാം തവണയും ഖത്തർ സ്വന്തമാക്കി. ഇന്ന് നടന്ന ഫൈനലിൽ ജോർദാനെ ആണ് ഖത്തർ തോൽപ്പിച്ചത്. ഈ ഏഷ്യൻ കപ്പിൽ അത്ഭുത യാത്ര നടത്തിയ ജോർദാന് കലാശ പോരാട്ടത്തിൽ മൂന്ന് പെനാൾട്ടി വിധികൾ ആണ് തിരിച്ചടിയായത്. 3-1 എന്ന സ്കോറിനായിരുന്നു ഖത്തറിന്റെ വിജയം. മൂന്ന് പെനാൾട്ടിയും ലക്ഷ്യത്തിൽ എത്തിച്ച് അഫീഫ് ഹാട്രിക്ക് നേടി.
22ആം മിനുട്ടിൽ ആദ്യ പെനാൾട്ടി വന്നു. അഫീഫ് പതറാതെ പന്ത് ലക്ഷ്യത്തിൽ എത്തിച്ചു. രണ്ടാം പകുതിയിൽ 67ആം മിനുട്ടിൽ അൽ നൈമതിലൂടെ ജോർദാൻ സമനില നേടി. ജോർദാന് പ്രതീക്ഷ വന്നു എങ്കിലും 73ആം മിനുട്ടിൽ വീണ്ടും ഖത്തറിന് പെനാൾട്ടി ലഭിച്ചു. അഫീഫ് വീണ്ടുൻ അവരെ മുന്നിൽ എത്തിച്ചു.
അവസാനം ഇഞ്ച്വറി ടൈമിലും ഖത്തറിന് അനുകൂലമായി പെനാൾട്ടി കിട്ടി. ഇതോടെ 3-1ന്റെ വിജയവും കിരീടവും ഖത്തർ ഉറപ്പിച്ചു.
