മാഞ്ചസ്റ്റർ യുണൈറ്റഡ് വിട്ടതിന് പിന്നാലെ വടക്കൻ അയർലൻഡ് പ്രതിരോധനിര താരമായ ജോണി ഇവാൻസ് പ്രൊഫഷണൽ ഫുട്ബോളിൽ നിന്ന് വിരമിച്ചു. മാഞ്ചസ്റ്റർ യുണൈറ്റഡിൻ്റെ അക്കാദമിയിലൂടെ വളർന്നുവന്ന ഇവാൻസ്, 2006ൽ ക്ലബ്ബിനായി അരങ്ങേറ്റം കുറിച്ചു. 2006 മുതൽ 2015 വരെ യുണൈറ്റഡിൻ്റെ പ്രധാന താരമായിരുന്ന അദ്ദേഹം, ഇതിനിടയിൽ റോയൽ ആൻ്റ്‌വെർപ്, സണ്ടർലാൻഡ് ടീമുകൾക്കായി ലോണിൽ കളിച്ചു.
പിന്നീട് 2015 മുതൽ 2018 വരെ വെസ്റ്റ് ബ്രോംവിച്ച് ആൽബിയോണിനായും 2018 മുതൽ 2023 വരെ ലെസ്റ്റർ സിറ്റിക്കായും കളിച്ചു, അവിടെ അദ്ദേഹം ടീമിൻ്റെ ക്യാപ്റ്റനുമായിരുന്നു. 2023ൽ ലെസ്റ്റർ സിറ്റിയിൽ നിന്ന് തിരികെ മാഞ്ചസ്റ്റർ യുണൈറ്റഡിൽ എത്തിയ ഇവാൻസ്, 2025ൽ വിരമിക്കുന്നത് വരെ ക്ലബ്ബിനൊപ്പം തുടർന്നു.
ദേശീയ തലത്തിൽ, 2006 മുതൽ 2024 വരെ വടക്കൻ അയർലൻഡിനെ പ്രതിനിധീകരിച്ച അദ്ദേഹം 107 മത്സരങ്ങളിൽ ദേശീയ ജേഴ്സി അണിഞ്ഞു.
ജോണി ഇവാൻസ് തൻ്റെ കരിയറിൽ നിരവധി പ്രധാന കിരീടങ്ങളും ബഹുമതികളും നേടിയിട്ടുണ്ട്. മാഞ്ചസ്റ്റർ യുണൈറ്റഡിനൊപ്പം മൂന്ന് പ്രീമിയർ ലീഗ് കിരീടങ്ങളും രണ്ട് ഫുട്ബോൾ ലീഗ് കപ്പ് കിരീടങ്ങളും ഒരു ചാമ്പ്യൻസ് ലീഗ് കിരീടവും ഒരു ഫിഫ ക്ലബ്ബ് ലോകകപ്പ് കിരീടവും നാല് കമ്മ്യൂണിറ്റി ഷീൽഡ് കിരീടങ്ങളും അദ്ദേഹം സ്വന്തമാക്കി. ലെസ്റ്റർ സിറ്റിക്കൊപ്പം ഒരു എഫ്എ കപ്പ് കിരീടവും മാഞ്ചസ്റ്റർ യുണൈറ്റഡിൻ്റെ രണ്ടാം വരവിൽ മറ്റൊരു എഫ്എ കപ്പ് കിരീടവും അദ്ദേഹം നേടി. സണ്ടർലാൻഡിനൊപ്പം ഒരു ചാമ്പ്യൻഷിപ്പ് കിരീടവും അദ്ദേഹം നേടിയിട്ടുണ്ട്.
ഫുട്ബോളിന് നൽകിയ സംഭാവനകൾക്ക് 2023ൽ അദ്ദേഹത്തിന് മെമ്പർ ഓഫ് ദി ഓർഡർ ഓഫ് ദി ബ്രിട്ടീഷ് എമ്പയർ (MBE) പുരസ്കാരം ലഭിച്ചു.
