വിവാദങ്ങൾക്ക് അവസാനം. കഴിഞ്ഞ ദിവസം നടന്ന നാടകീയ രംഗങ്ങൾക്ക് ശേഷം എഫ് സി ഗോവയുടെ താരം ഹ്യൂഗോ ബൗമസ് ക്ലബ് വിട്ടിരിക്കുകയാണ്. സിറ്റി ഗ്രൂപ്പ് സ്വന്തമാക്കിയ മുംബൈ സിറ്റിയാണ് ബൗമസിനെ വൻ വില നൽകി ടീമിൽ എത്തിച്ചിരിക്കുന്നത്. ബൗമസിനെ സ്വന്തമാക്കാനായി അദ്ദേഹത്തിന്റെ റിലീസ് ക്ലോസായ ഒന്നരക്കോടിയോളം വരുന്ന തുകയാണ് മുംബൈ സിറ്റി എഫ് സി ഗോവയ്ക്ക് നൽകിയത്.
ഇന്ത്യൻ ഫുട്ബോൾ ട്രാൻസ്ഫറിൽ ഒരു ക്ലബിന് ട്രാൻസ്ഫർ തുകയായി ലഭിക്കുന്ന ഏറ്റവും വലിയ തുകയാണിത്. നേരത്തെ ഒരു കോടിക്ക് ആയിരുന്നു പെട്രോ മാൻസിയെ ചെന്നൈ സിറ്റിയിൽ നിന്ന് ജപ്പാൻ ക്ലബായ ആൽബിരക്സ് നിഗറ്റ സ്വന്തമാക്കിയത്. ആ ട്രാൻസ്ഫർ തുക ഇപ്പോൾ പഴയ കഥയായി. 1.6 കോടിയാകും ഈ ട്രാൻസ്ഫർ വഴി ഗോവയ്ക്ക് ലഭിക്കുക.
കഴിഞ്ഞ സീസണിൽ എഫ് സി ഗോവയുടെ ഏറ്റവും പ്രധാനപ്പെട്ട താരമായിരുന്നു ബൗമസ്. ഐ എസ് എല്ലിലെ കഴിഞ്ഞ സീസണിലെ ഏറ്റവും മികച്ച താരമായും ബൗമസ് തിരഞ്ഞെടുക്കപ്പെട്ടിരുന്നു. ഗോവയ്ക്ക് വേണ്ടി കഴിഞ്ഞ സീസണിൽ പതിനൊന്ന് ഗോളുകളും 10 അസിസ്റ്റുമാണ് ഹ്യൂഗോ സംഭാവന ചെയ്തത്. ഗോവയെ ലീഗിൽ ഒന്നാം സ്ഥാനത്ത് എത്തിക്കാനും അതിലൂടെ എ എഫ് സി ചാമ്പ്യൻസ് ലീഗ് യോഗ്യത നേടിക്കൊടുക്കാനും ബൗമസിനായിരുന്നു.അവസാന മൂന്ന് സീസണായി ഗോവയ്ക്ക് ഒപ്പമുള്ള താരം 42 മത്സരങ്ങൾ ഐ എസ് എല്ലിൽ കളിച്ചു. ലീഗിൽ 16 ഗോളുകൾ നേടാനും 17 ഗോളുകൾ ഒരുക്കാനും ബൗമസിനായിട്ടുണ്ട്.
നേരത്തെ ഫാളിനെയും മന്ദർ റാവുവിനെയും അഹ്മദ് ജാഹുവിനെയും ഗോവയിൽ നിന്ന് മുംബൈ സിറ്റി സ്വന്തമാക്കിയിരുന്നു. മുൻ എഫ് സി ഗോവ കോച്ച് ലൊബേരയും ഇപ്പോൾ മുംബൈ സിറ്റിയിലാണ് ഉള്ളത്.
