മലയാളി താരം ബ്രിട്ടോക്ക് വീണ്ടും ഗോൾ, രാജസ്ഥാന് മുന്നിലും സുദേവ ഡൽഹി കീഴടങ്ങി

Picsart 22 11 26 16 52 32 484

സുദേവ ഡൽഹിയെ ഒന്നിനെതിരെ മൂന്ന് ഗോളുകൾക്ക് തോൽപ്പിച്ച് രാജസ്ഥാൻ യുണൈറ്റഡ് വീണ്ടും വിജയവഴിയിൽ. മാർട്ടിൻ, മലയാളി താരം ബ്രിട്ടോ, മാംമ്പെറ്റലീവ് എന്നിവർ വിജയികൾക്കായി ഗോൾ നേടിയപ്പോൾ സുദേവയുടെ ആശ്വാസ ഗോൾ റ്റെറ്റ്സുകി മിസാവയാണ് കണ്ടെത്തിയത്. ആദ്യ മത്സരത്തിൽ വിജയത്തോടെ ആരംഭിച്ചെങ്കിലും തുടർന്ന് രണ്ടു മത്സരങ്ങളിൽ സമനിലയും തോൽവിയും നേരിട്ട രാജസ്ഥാന് ആശ്വാസമാണ് ഈ വിജയം. അതേ സമയം ലീഗിലെ നാലാം മത്സരത്തിലും തോൽവി മാത്രം നേരിട്ട് വിയർക്കുകയാണ് സുദേവ ഡൽഹി.

ബ്രിട്ടോ 22 11 26 16 49 46 272

ഛത്രസാൽ സ്റ്റേഡിയത്തിൽ സന്ദർശകരാണ് ആദ്യം ഗോൾ നേടിയത്. പതിനഞ്ചാം മിനിറ്റിൽ ക്രോസിൽ നിന്നെത്തിയ ബോൾ ഹെഡറിലൂടെ വലയിൽ എത്തിച്ച് നായകൻ മാർട്ടിൻ ഷാവേസ് ടീമിന് മികച്ച തുടക്കം നൽകി. ഏഴു മിനിട്ടുകൾക്ക് ശേഷം സുദേവ സമനില ഗോൾ കണ്ടെത്തി. റ്റെറ്റ്സു മിസാവയാണ് എതിർ വല കുലുക്കിയത്.

ആദ്യ പകുതിയുടെ എക്സ്ട്രാ മിനിറ്റിൽ രാജസ്‌ഥാൻ വീണ്ടും ലീഡ് നേടി. ബോക്സിന് അകത്തു നിന്നും ബ്രിറ്റോയുടെ ഒരു മികച്ച ഷോട്ട് കീപ്പർ ഒരവസരവും നൽകാതെ വലയിൽ എത്തി. എൺപതിയാറാം മിനിറ്റിൽ പ്രതിരോധ താരം മാംമ്പെറ്റലീവ് കൂടി ഗോൾ കണ്ടെത്തിയതോടെ രാജസ്ഥാൻ വിജയം സുനിശ്ചിതമാക്കി. ഇതോടെ താൽക്കാലികമായി പോയിന്റ് പട്ടികയിൽ നാലാമതെത്താനും അവർക്കായി.