ഇംഗ്ലണ്ട് ലോകകപ്പ് ക്യാമ്പ് വിട്ട് റഹീം സ്റ്റർലിംഗ് ഇംഗ്ലണ്ടിലേക്ക് മടങ്ങി. ചെൽസി താരം ഖത്തറിൽ ലോകകപ്പ് കളിക്കുന്ന സമയത്ത് ആയുധങ്ങളും ആയി ഒരു വിഭാഗം കള്ളന്മാർ അദ്ദേഹത്തിന്റെ ചെറിയ കുട്ടികളും ഭാര്യയും ഉള്ളിൽ ഉള്ളപ്പോൾ വീട് കൊള്ളയടിച്ചത് അദ്ദേഹം നാട്ടിലേക്ക് മടങ്ങാൻ കാരണം. സംഭവത്തിനു ശേഷം മാനസികമായി തകർന്ന കുടുംബത്തിന് ഒപ്പം എത്താൻ താരം തീരുമാനിക്കുക ആയിരുന്നു.
ശനിയാഴ്ച ആണ് സംഭവം നടന്നത്. താരത്തിന് ഇംഗ്ലീഷ് ടീമും ഫുട്ബോൾ അസോസിയേഷനും പരിശീലകൻ ഗാരത് സൗത്ത്ഗേറ്റും പൂർണ പിന്തുണ നൽകി. തുടർന്ന് ആണ് താരം ഇംഗ്ലണ്ടിലേക്ക് മടങ്ങാൻ തീരുമാനിച്ചത്. ഇനി താരം ലോകകപ്പ് ടീമിലേക്ക് തിരിച്ചു എത്തുമോ എന്നു അദ്ദേഹം തന്നെ തീരുമാനിക്കും. ഇംഗ്ലണ്ടിന് ആയി ആദ്യ മത്സരത്തിൽ ഇറാന് എതിരെ സ്റ്റർലിംഗ് ഗോൾ നേടിയിരുന്നു. നേരത്തെ പുറത്ത് വിടാത്ത കുടുംബ പ്രശ്നങ്ങൾ കാരണം മറ്റൊരു ഇംഗ്ലണ്ട് താരം ബെൻ വൈറ്റും നാട്ടിലേക്ക് മടങ്ങിയിരുന്നു.
