കസാകിസ്ഥാനിൽ ഒരുപറ്റം യുവതാരങ്ങളുമായി പോയ മാഞ്ചസ്റ്റർ യുണൈറ്റഡിന് യൂറോപ്പ ലീഗിൽ പരാജയം. ഇന്ന് നടന്ന ഗ്രൂപ്പ് മത്സരത്തിൽ അസ്റ്റാനയാണ് മാഞ്ചസ്റ്റർ യുണൈറ്റഡിനെ വീഴ്ത്തിയത്. ഒന്നിനെതിരെ രണ്ടു ഗോളുകൾക്കായിരുന്നു അസ്റ്റാനയുടെ വിജയം. യുവതാരങ്ങൾ യുണൈറ്റഡിനായി മികച്ചു നിന്നു എങ്കിലും പ്രതിരോധത്തിലെ പിഴവുകൾ വിനയാവുകയായിരുന്നു.
ലിംഗാർഡ്, ലൂക് ഷോ എന്നിവർ ഒഴികെ യുണൈറ്റഡ് നിരയിലെ ബാക്കി ഉള്ളവരാരും യുണൈറ്റഡിനായി അധികം കളിച്ചവരായിരുന്നില്ല. ആദ്യ ഇലവനിൽ തന്നെ നാല് അരങ്ങേറ്റക്കാർ ഉണ്ടായിരുന്നു. മത്സരം മികച്ച രീതിയിലാണ് യുണൈറ്റഡ് തുടങ്ങിയത്. പത്താം മിനുട്ടിൽ ഗോൾ കണ്ടെത്താനും യുണൈറ്റഡിനായി. ക്യാപ്റ്റൻ ആം ബാൻഡ് അണിഞ്ഞ ലിംഗാർഡ് ആയിരുന്നു ഗോൾ നേടിയത്.
തുടർന്നും ഒരുപാട് അവസരങ്ങൾ മാഞ്ചസ്റ്റർ യുണൈറ്റഡിന് ലഭിച്ചു. പക്ഷെ രണ്ടാം ഗോൾ നേടാൻ യുണൈറ്റഡിനായില്ല. രണ്ടാം പകുതിയിൽ ഹോം ടീമിന് തിരിച്ചുവരാൻ ആയി. 55ആം മിനുട്ടിൽ സമനില ഗോൾ വന്നു. ഷോംകോ ആയിരുന്നു ഗോൾ നേടിയത്. താമസിയാതെ ഒരു സെൽഫ് ഗോക്ക് അസ്റ്റാനയെ മുന്നിൽ എത്തിക്കുകയും ചെയ്തു. മാഞ്ചസ്റ്റർ യുണൈറ്റഡ് നേരത്തെ തന്നെ നോക്കൗട്ട് യോഗ്യത ഉറപ്പിച്ചതിനാൽ ഈ പരാജയം യുണൈറ്റഡിനെ കാര്യമായി ബാധിക്കില്ല.
