2006ന് ശേഷം ആദ്യ യൂറോപ്യൻ ഫൈനൽ ലക്‌ഷ്യം വെച്ച് ആഴ്‌സണൽ ഇന്ന് എമിറേറ്റ്സിൽ വലൻസിയയെ നേരിടും. മൂന്ന് തവണ തുടർച്ചായി സെവിയ്യയുടെ കൂടെ യൂറോപ്പ കിരീടം നേടിയ ഏംറി ആഴ്‌സണലിന് തങ്ങളുടെ ആദ്യ യൂറോപ്യൻ കിരീടം നേടികൊടുക്കാനാണ് ഇന്ന് ഇറങ്ങുന്നത്. കൂടാതെ അടുത്ത വർഷത്തെ ചാമ്പ്യൻസ് ലീഗ് യോഗ്യതക്കുള്ള ആഴ്‌സണലിന്റെ എളുപ്പമാർഗവുമാണ് യൂറോപ്പ. കഴിഞ്ഞ സീസണിൽ യൂറോപ്പ ലീഗ് സെമിയിൽ എത്തിയ ആഴ്‌സണൽ അത്ലറ്റികോ മാഡ്രിഡിനോട് തോറ്റ് പുറത്തായിരുന്നു.
ക്വാർട്ടറിൽ ഇറ്റാലിയൻ വമ്പന്മാരായ നാപോളിയെ തോൽപ്പിച്ചാണ് ഏംറി തന്റെ മുൻ ക്ലബായ വലൻസിയയെ നേരിടാനിറങ്ങുന്നത്. ആഴ്‌സണൽ നിരയിൽ വിലക്ക് നേരിടുന്ന ഫ്രാൻസിസ് കോക്വേലിൻ ഇന്ന് ഇറങ്ങില്ല. പകരം ഗബ്രിയേൽ പോളിസ്റ്റ ടീമിൽ ഇടം കണ്ടെത്തുമെന്നാണ് പ്രതീക്ഷിക്കുന്നത്. ഈ സീസണിന്റെ അവസാനത്തോടെ ആഴ്‌സണൽ വിടുന്ന റാംസിയും പരിക്ക് മൂലം ഇന്നത്തെ മത്സരത്തിനുണ്ടാവില്ല. നാപോളിക്കെതിരായ മത്സരത്തിലേറ്റ പരിക്ക് റാംസിയുടെ ആഴ്സണലിലെ കരിയറിന് അവസാനം കുറിച്ചിരുന്നു.
2013/ 14 സീസണിൽ ഉനൈ ഏംറിയുടെ സെവിയ്യയോട് തോറ്റ് വലൻസിയ യൂറോപ്പ ലീഗിന്റെ സെമി ഫൈനലിൽ പുറത്തായിരുന്നു. ഇതിന് പ്രതികാരം തേടിയാവും അവർ ഇറങ്ങുക. ക്വാർട്ടറിൽ ലാ ലീഗ ടീമായ വിയ്യാറയലിനെ 5-1ന് രണ്ടു പാദങ്ങളിലുമായി തോൽപ്പിച്ചാണ് വലൻസിയ സെമി ഉറപ്പിച്ചത്. മുൻപ് ഇരുവരും 5 തവണ ഏറ്റുമുട്ടിയപ്പോൾ ഒരു തവണ മാത്രമാണ് വലൻസിയയെ തോൽപ്പിക്കാൻ ആഴ്‌സണലിന് കഴിഞ്ഞത്. ലാ ലീഗയിൽ ആറാം സ്ഥാനത്ത് നിൽക്കുന്ന വലൻസിയക്ക് അടുത്ത സീസണിൽ ചാമ്പ്യൻസ് ലീഗ് യോഗ്യതക്ക് യൂറോപ്പ ലീഗ് കിരീടം നേടുകയും വേണം.
