യൂറോ കപ്പ് ക്വാർട്ടർ ഫൈനൽ ഇന്ന് ആരംഭിക്കുകയാണ്. രണ്ട് വൻ പോരാട്ടങ്ങൾ ആണ് ഇന്ന് ക്വാർട്ടർ ഫൈനലിൽ നടക്കുന്നത്. രാത്രി 9.30ന് നടക്കുന്ന ആദ്യ മത്സരത്തിൽ സ്പെയിനും ജർമ്മനിയും നേർക്കുനേർ വരും. ഈ ടൂർണമെന്റിൽ ഇതുവരെ ഏറ്റവും മികച്ച പ്രകടനം നടത്തിയ ടീമാണ് സ്പെയിൻ. പ്രീക്വാർട്ടറിൽ ജോർജിയയെ 4-1ന് തകർത്താണ് അവർ ക്വാർട്ടറിൽ എത്തിയത്. ലമിനെ യമാൽ, ഇനികോ വില്യംസ് തുടങ്ങിയ യുവതാരങ്ങളുടെ പ്രകടനമാണ് സ്പെയിനിന്റെ കരുത്ത്..
ജർമ്മനിക്ക് ആതിഥേയർ ആണെന്നും മുൻതൂക്കം ഉണ്ട്. ഡെന്മാർക്കിനെ 2-0ന് തോൽപ്പിച്ച് ആണ് ജർമ്മനി ക്വാർട്ടറിലേക്ക് വരുന്നത്. ഈ യൂറോ കപ്പിലെ ഭൂരിഭാഗം ടീമുകളെയും പോലെ ഗോളടി തന്നെയാണ് ജർമ്മനിയുടെ തലവേദന. ജമാൽ മുസിയാലയുടെ ഫോം ആണ് അവരുടെ പ്രതീക്ഷ.
ഇന്ന് നടക്കുന്ന രണ്ടാം ക്വാർട്ടർ ഫൈനലിൽ പോർച്ചുഗൽ ഫ്രാൻസിനെ നേരിടും. രാത്രി 12.30നാണ് ഈ മത്സരം. പ്രീക്വാർട്ടറിൽ കിതച്ചാണ് രണ്ട് ടീമും വരുന്നത്. പോർച്ചുഗൽ ഷൂട്ടൗട്ട് വരെ നീണ്ട പോരാട്ടത്തിൽ സ്ലൊവീന്യയെ തോൽപ്പിച്ചപ്പോൾ, ഫ്രാൻസ് ഒരു സെൽഫ് ഗോളിന്റെ ബലത്തിൽ ആണ് ബെൽജിയത്തെ മറികടന്നത്. റൊണാൾഡോയും എംബപ്പെയും തന്നെയാകും ഈ മത്സരത്തിന്റെ ഹൈലൈറ്റ്.
