ചാംപ്യൻസ് ലീഗിലെ ഇത്തവണത്തെ കടുപ്പമേറിയ ഗ്രൂപ്പികളിൽ ഒന്നിൽ വിജയം ലക്ഷ്യമിട്ട് ലിവർപൂൾ ഇറങ്ങുന്നു. റേഞ്ചേഴ്‌സ് ആണ് ക്ലോപ്പിന്റെയും സംഘത്തിന്റയും എതിരാളികൾ. അയക്സും നപോളിയും ചേർന്ന ഗ്രൂപ്പിൽ നിന്നും കടക്കണമെങ്കിൽ മത്സരത്തിൽ വിജയം ഉറപ്പിക്കേണ്ടതുണ്ട് ലിവർപൂളിന്. റേഞ്ചേഴ്‌സ് ആവട്ടെ ഗ്രൂപ്പിലെ ആദ്യ വിജയമാണ് ലക്ഷ്യമിടുന്നത്. നപോളിക്കെതിരെ തോൽവി നേരിടേണ്ടി വന്നെങ്കിലും അയാകസിനെ തോൽപ്പിച്ച് നിർണായകമായ പോയിന്റുകൾ ലിവർപൂൾ നേടിയിരുന്നു.
പ്രതിരോധം തന്നെയാണ് ക്ലോപ്പിനെ അലട്ടുന്ന പ്രധാന പ്രശ്നം. അവസാന മത്സരത്തിൽ ബ്രൈറ്റൺ മൂന്ന് ഗോളുകളാണ് നേടിയത്. ലീഗിൽ ഏഴ് മത്സരങ്ങളിൽ നിന്നും രണ്ടു വിജയം മാത്രമാണ് ടീമിന് നേടാൻ ആയത്. മധ്യനിരയിലും ടീമിന് പ്രശ്‌നങ്ങൾ ഉണ്ട്. എങ്കിലും ഗോൾ കണ്ടെത്തുന്ന ലൂയിസ് ഡിയാസ്, ഫിർമിനോ എന്നിവരെ കൂടാതെ സലയും ഡാർവിൻ ന്യൂനസും ജോട്ടയും കൂടി ചേരുമ്പോൾ ഏതു പ്രതിരോധവും പിളർത്താം എന്നതാണ് ലിവർപൂളിന് ആശ്വാസം നൽകുന്നത്. റേഞ്ചേഴ്‌സ് ഇത്തവണ ലീഗിൽ മികച്ച ഫോമിലാണ്. എട്ട് മത്സരങ്ങളിൽ നിന്നും ആറു വിജയവുമായി രണ്ടാം സ്ഥാനത്താണ് നിലവിൽ. ഈ ഫോം ചാമ്പ്യൻസ് ലീഗിലും തുടരാൻ ആവും അവരുടെ ശ്രമം.
