ചെൽസിക്ക് റെക്കോർഡ് നഷ്ടം; പ്രീമിയർ ലീഗ് ചരിത്രത്തിലെ ഏറ്റവും വലിയ തുക

ഇംഗ്ലീഷ് പ്രീമിയർ ലീഗ് ചരിത്രത്തിലെ ഏറ്റവും വലിയ സാമ്പത്തിക നഷ്ടം രേഖപ്പെടുത്തി ചെൽസി എഫ്‌സി. 2025 ജൂൺ 30-ന് അവസാനിച്ച സാമ്പത്തിക വർഷത്തിൽ 262.4 ദശലക്ഷം പൗണ്ടിന്റെ (ഏകദേശം 2,700 കോടി രൂപ) വൻ നഷ്ടമാണ് ക്ലബ്ബ് ഔദ്യോഗികമായി റിപ്പോർട്ട് ചെയ്തിരിക്കുന്നത്. ഇംഗ്ലീഷ് ഫുട്ബോൾ ചരിത്രത്തിൽ ഒരു ക്ലബ്ബ് ഒരൊറ്റ സീസണിൽ നേരിടുന്ന ഏറ്റവും വലിയ തിരിച്ചടിയാണിത്. 2010-11 സീസണിൽ മാഞ്ചസ്റ്റർ സിറ്റി കുറിച്ച 197.5 ദശലക്ഷം പൗണ്ടിന്റെ നഷ്ടമെന്ന റെക്കോർഡാണ് ഇതോടെ പഴങ്കഥയായത്.

ടോഡ് ബോഹ്‌ലി – ക്ലിയർലേക്ക് ഉടമസ്ഥതയ്ക്ക് കീഴിലുള്ള ക്ലബ്ബിന്റെ സാമ്പത്തിക പ്രതിസന്ധി ഈ കണക്കുകൾ വ്യക്തമാക്കുന്നു. ക്ലബ്ബ് വേൾഡ് കപ്പ് കിരീടം നേടിയതിലൂടെ ലഭിച്ച വരുമാനം ഉൾപ്പെടെ 490.9 ദശലക്ഷം പൗണ്ട് വരുമാനം നേടാൻ സാധിച്ചെങ്കിലും, പ്രവർത്തനച്ചെലവ് (Operating costs) കുത്തനെ ഉയർന്നതാണ് ഇത്രയും വലിയ നഷ്ടത്തിന് കാരണമായതെന്ന് ചെൽസി അധികൃതർ വ്യക്തമാക്കി. മുൻ ഉടമ റോമൻ അബ്രമോവിച്ചിന്റെ കാലത്തെ വെളിപ്പെടുത്താത്ത ഇടപാടുകളുമായി ബന്ധപ്പെട്ട് പ്രീമിയർ ലീഗ് നിയമങ്ങൾ ലംഘിച്ചതിന് 10.75 ദശലക്ഷം പൗണ്ട് പിഴയും ക്ലബ്ബ് ഈ വർഷം ഒടുക്കേണ്ടി വന്നിരുന്നു.

എങ്കിലും, ലീഗിന്റെ ലാഭക്ഷമത, സുസ്ഥിരത നിയമങ്ങൾ (Profitability and Sustainability Rules) പാലിച്ചതിനാൽ പോയിന്റ് കുറയ്ക്കുന്ന നടപടികളിൽ നിന്ന് ചെൽസി നിലവിൽ രക്ഷപ്പെട്ടിട്ടുണ്ട്.