ചെൽസി നിരയിൽ റുഡിഗർ തിരിച്ചെത്തി, ടോമോറി പുറത്ത്

ചാമ്പ്യൻസ് ലീഗിന്റെ നിർണ്ണായക മത്സരത്തിൽ ലില്ലെയെ നേരിടാൻ ചെൽസി നിരയിൽ പരിക്ക് മാറി റുഡിഗർ തിരിച്ചെത്തും. പ്രതിരോധ നിരയെ കുറിച്ച് പഴി കേൾക്കുന്ന ചെൽസിക്ക് താരത്തിന്റെ തിരിച്ചുവരവ് ആശ്വാസമാണ്. അതെ സമയം താരം ആദ്യ ഇലവനിൽ ഉണ്ടാവുമെന്ന് ഉറപ്പില്ല. ചാമ്പ്യൻസ് ലീഗിൽ അടുത്ത റൗണ്ട് ഉറപ്പിക്കാൻ നാളെ ലില്ലെക്കെതിരെയുള്ള മത്സരം നിർണ്ണായകമാണ്.

കഴിഞ്ഞ സെപ്റ്റംബറിലേറ്റ പരിക്കിന് ശേഷം റുഡിഗർ ചെൽസിക്ക് വേണ്ടി കളിച്ചിരുന്നില്ല. അതെ സമയം മറ്റൊരു പ്രതിരോധ താരം ഫികയോ ടോമോറി ലില്ലെക്കെതിരെ ഉണ്ടാവില്ലെന്ന് പരിശീലകൻ ഫ്രാങ്ക് ലമ്പാർഡ് വ്യക്തമാക്കി. കഴിഞ്ഞ ദിവസം ഏവർട്ടണെതീരെ ടോമോറി പകരക്കാരുടെ ബെഞ്ചിലായിരുന്നു. കഴിഞ്ഞ ദിവസം എവർട്ടണെതിരെ നടന്ന മത്സരത്തിൽ ചെൽസി 3-1ന് തോറ്റിരുന്നു.