യുഫേഫ ചാമ്പ്യൻസ് ലീഗിൽ ജർമ്മൻ സ്റ്റുഗാർട്ടിനെ 4-1 നു തോൽപ്പിച്ചു പ്ലെ ഓഫ് കളിക്കാൻ ഇടം ഉറപ്പിച്ചു പി.എസ്.ജി. ജയത്തോടെ 13 പോയിന്റുകൾ നേടി 15 സ്ഥാനത്ത് എത്തിയ അവർ പ്ലെ ഓഫിൽ ഇടം നേടിയപ്പോൾ 26 മതുള്ള സ്റ്റുഗാർട്ട് ടൂർണമെന്റിൽ നിന്നു പുറത്തായി. 17, 35, 54 മിനിറ്റുകളിൽ ഗോളുകൾ നേടി ഹാട്രിക് പൂർത്തിയാക്കിയ ഉസ്മാൻ ഡെംബലെയുടെ മികവിൽ ആണ് പാരീസ് വലിയ ജയം ഇന്ന് കുറിച്ചത്. ബാർകോളയാണ് പാരീസിന്റെ നാലാം ഗോൾ നേടിയത്.
സ്ലൊവാക്യൻ ക്ലബ് സ്ലൊവനെ 3-1 നു മറികടന്ന ജർമ്മൻ വമ്പന്മാർ ആയ ബയേൺ മ്യൂണികും പ്ലെ ഓഫ് കളിക്കാൻ ആണ് യോഗ്യത നേടിയത്. 15 പോയിന്റുകൾ നേടിയ ബയേണിന് 12 സ്ഥാനത്ത് എത്താൻ ആണ് ആയത്. ബയേണിന് ആയി തോമസ് മുള്ളർ, ഹാരി കെയിൻ, കിങ്സിലി കോമാൻ എന്നിവർ ആണ് ഗോൾ നേടിയത്. ശാക്തറിനെ 3-1 നു മറികടന്ന ബൊറൂസിയ ഡോർട്ട്മുണ്ട് 15 പോയിന്റുകൾ തന്നെ നേടി ഗോൾ വ്യത്യാസത്തിന്റെ മികവിൽ പത്താം സ്ഥാനത്ത് എത്തി പ്ലെ ഓഫിലേക്ക് യോഗ്യത നേടി. ഗുയിറാസിയുടെ ഇരട്ടഗോൾ മികവിൽ ആണ് ഡോർട്ട്മുണ്ട് ജയം കണ്ടത്‌.
