ചാമ്പ്യൻസ് ലീഗിൽ ആദ്യ മത്സരത്തിന് ഇറങ്ങിയ മാഞ്ചസ്റ്റർ സിറ്റിക്ക് ഞെട്ടിക്കുന്ന തോൽവി. ഫ്രഞ്ച് ടീം ലിയോണാണ്‌സീസണിലെ ആദ്യ തോൽവി സമ്മാനിച്ചത്. എത്തിഹാദ് സ്റ്റേഡിയത്തിൽ 1-2 എന്ന സ്കോറിനാണ് ഫ്രഞ്ച് ടീം ജയം നേടിയത്. ടച്ച് ലൈൻ ബാൻ നേരിടുന്ന ഗാർഡിയോളക്ക് തന്റെ ടീം ആദ്യ തോൽവി വഴങ്ങുന്ന കാഴ്ച്ച കണ്ടിരിക്കാൻ മാത്രമാണ് സാധിച്ചത്.
ആദ്യ പകുതിയിൽ പന്തടക്കത്തിൽ സിറ്റി മുന്നിട്ട് നിന്നെങ്കിലും ലിയോണിന്റെ ഫിനിഷിങ്ങിലെ കൃത്യത സിറ്റിക്ക് തിരിച്ചടിയായി. 26 ആം മിനുട്ടിലാണ് ലിയോണിന്റെ ആദ്യ ഗോൾ പിറന്നത്. ഫെകിർ ബോക്സിലേക്ക് നൽകിയ പാസ്സ് ക്ലിയർ ചെയ്യുന്നതിൽ ഡെൽഫിന് പിഴച്ചപ്പോൾ അവസരം മുതലാക്കി മാക്സെൽ കോർനെറ്റ് പന്ത് വലയിലാക്കി. 43 ആം മിനുട്ടിൽ ഇടം കാലൻ ഷോട്ടിലൂടെ ഫെകിർ അവരുടെ ലീഡ് രണ്ടാക്കി ഉയർത്തി.
രണ്ടാം പകുതി പത്ത് മിനിറ്റ് പിന്നിട്ടപ്പോൾ സിറ്റി ഗുണ്ടഗനെ പിൻവലിച്ചു സാനെയെ കളത്തിൽ ഇറക്കി. പക്ഷെ പിന്നീട് ഡിപ്പായുടെ ഷോട്ട് പോസ്റ്റിൽ തട്ടി മടങ്ങിയത് സിറ്റിക്ക് ഭാഗ്യമായി. 66 ആം മിനുട്ടിൽ ബെർണാണ്ടോ സിൽവയിലൂടെ സിറ്റി ഒരു ഗോൾ മടക്കി. സാനെയാണ് അസിസ്റ്റ്. പിന്നീട് സിറ്റി നിരന്തരം സമനില ഗോളിനായി ശ്രമിച്ചെങ്കിലും സമനില ഗോൾ പിറന്നില്ല.
