ലീഗ് കപ്പിൽ ലെസ്റ്റർ സിറ്റിക്കെതിരെ വമ്പൻ ജയവുമായി ലിവർപൂൾ. 3-3ന് സമനിലയിൽ അവസാനിച്ച മത്സരത്തിൽ പെനാൽറ്റി ഷൂട്ട് ഔട്ടിലൂടെയാണ് ലിവർപൂൾ ലെസ്റ്റർ സിറ്റിയെ തോൽപിച്ചത്. മത്സരത്തിന്റെ 95ആം മിനുട്ടിൽ വരെ ഒരു ഗോളിന് പിറകിൽ നിന്നതിന് ശേഷമാണ് ലിവർപൂൾ സമനില നേടി മത്സരം പെനാൽറ്റി ഷൂട്ട് ഔട്ടിൽ എത്തിച്ചത്. പെനാൽറ്റി ഷൂട്ട് ഔട്ടിൽ എത്തിയ മത്സരത്തിൽ ലെസ്റ്റർ സിറ്റിയുടെ രണ്ട് കിക്കുകൾ ലിവർപൂൾ ഗോൾ കീപ്പർ കെല്ലെഹർ രക്ഷപെടുത്തുകയായിരുന്നു. ലിവർപൂൾ താരം മിനമിനോ പെനാൽറ്റി കിക്ക്‌ നഷ്ട്ടപെടുത്തിയെങ്കിലും സഡൻ ഡെത്തിൽ ഗോൾ നേടി ജോട്ട ലിവർപൂളിന്റെ ജയം ഉറപ്പിക്കുകയായിരുന്നു.
നേരത്തെ ജാമി വാർഡി രണ്ട് ഗോളുകൾ നേടി ലെസ്റ്റർ സിറ്റിക്ക് മികച്ച തുടക്കമാണ് നൽകിയത്. തുടർന്ന് അധികം താമസിയാതെ ചേമ്പർലൈനിലൂടെ ലിവർപൂൾ ഒരു ഗോൾ തിരിച്ചടിച്ച് മത്സരത്തിലേക്ക് തിരിച്ചുവന്നെങ്കിലും മികച്ചൊരു ഗോളിലൂടെ മാഡിസൺ ലെസ്റ്റർ സിറ്റിയുടെ ലീഡ് 2 ഗോളായി ഉയർത്തുകയായിരുന്നു. തുടർന്ന് രണ്ടാം പകുതിയിൽ ജോട്ടയിലൂടെ ഒരു ഗോൾ മടക്കിയ ലിവർപൂൾ മത്സരം അവസാനിക്കാൻ സെക്കൻഡുകൾ മാത്രം ബാക്കിനിൽക്കെ മിനമിനോയിലൂടെ മത്സരത്തിൽ സമനില പിടിക്കുകയായിരുന്നു.
