ഈഡൻ ഹസാർസ് നേടിയ ഏക ഗോളിന് ബോൺമൗത്തിനെ മറികടന്ന് ചെൽസി കാരബാവോ കപ്പിന്റെ സെമി ഫൈനലിൽ കടന്നു. ഏതാനും മാറ്റങ്ങളുമായി ഇറങ്ങിയ ചെൽസി ഗോൾ കണ്ടെത്താൻ വിഷമിച്ചിരിക്കെ പകരക്കാരനായി ഇറങ്ങിയാണ് ഹസാർഡ് ചെൽസിയുടെ ജയം ഉറപ്പിച്ചത്. ടോട്ടൻഹാമാണ് ചെൽസിക്ക് സെമിയിൽ എതിരാളികൾ.
ആദ്യ പകുതിയിൽ ആധിപത്യം പുലർത്തിയെങ്കിലും ചെൽസിക്ക് ഗോൾ കണ്ടെത്തനായിരുന്നില്ല. വില്ലിയനിലൂടെ ലഭിച്ച അവസരങ്ങൾ പക്ഷെ താരം പാഴാക്കിയതോടെ രണ്ടാം പകുതി പത്ത് മിനുട്ട് പിന്നിട്ടപ്പോൾ താരത്തെ പിൻവലിച്ച സാരി പെഡ്രോയേയും ഏറെ വൈകാതെ ബാർക്ലിയെ പിൻവലിച്ചു ഹസാർഡിനെയും കളത്തിൽ ഇറക്കുകയായിരുന്നു. 84 ആം മിനുട്ടിൽ എമേഴ്സന്റെ പാസ്സിൽ നിന്നാണ് ഹസാർഡിന്റെ ഗോൾ പിറന്നത്.
