ഈ സീസണ്‍ ബിഗ് ബാഷില്‍ ഇംഗ്ലീഷ് താരം തൈമല്‍ മില്‍സിന്റെ സേവനം ഹോബാര്‍ട്ട് ഹറികെയന്‍സിനു നഷ്ടമാകും. കുറഞ്ഞത് എട്ട് മാസമെങ്കിലും പരിക്കേറ്റ താരം കളത്തിനു പുറത്തിരിക്കേണ്ടി വരുമെന്നാണ് അറിയുന്നത്. ഹാംസ്ട്രിംഗിനേറ്റ പരിക്കാണ് താരത്തിനു സീസണ്‍ നഷ്ടമാകുവാന്‍ ഇടയാക്കിയത്. കഴിഞ്ഞ വ്യാഴാഴ്ച പരിശീലന മത്സരത്തിനിടെയാണ് മില്‍സിനു പരിക്കേറ്റത്.
തുടര്‍ന്ന് ഹോബാര്‍ട്ടിന്റെ ഉദ്ഘാടന മത്സരത്തിലും താരം പങ്കെടുത്തിരുന്നില്ല. ലോകത്താകമാനമുള്ള ടി20 ലീഗുകളിലെ സ്ഥിരം സാന്നിദ്ധ്യമാണ് തൈമല്‍ മില്‍സ്. ഐപിഎലില്‍ റോയല്‍ ചലഞ്ചേഴ്സ് ബാംഗ്ലൂരിനു വേണ്ടി കളിച്ചിട്ടുള്ള താരം ഇംഗ്ലീഷ് കൗണ്ടിയായ സസ്സെക്സിന്റെ ടീമിലെ അംഗമാണ്.
