എ.ടി.പി 500 മാസ്റ്റേഴ്സ് ആയ സെർബിയൻ ഓപ്പണിൽ കിരീടം നേടി റഷ്യയുടെ രണ്ടാം സീഡ് ആന്ദ്ര റൂബ്ലേവ്. ഫൈനലിൽ ലോക ഒന്നാം നമ്പർ നൊവാക് ജ്യോക്കോവിച്ചിനെയാണ് റൂബ്ലേവ് തോൽപ്പിച്ചത്. കരിയറിൽ ആദ്യമായാണ് റൂബ്ലേവ് ജ്യോക്കോവിച്ചിനെ തോൽപ്പിക്കുന്നത്. കരിയറിലെ പതിനൊന്നാം കിരീടവും ഈ സീസണിലെ മൂന്നാം കിരീടവും ആണ് റൂബ്ലേവിനു ഇത്.
മത്സരത്തിൽ ആദ്യ സെറ്റ് 6-2 നു നേടിയ റഷ്യൻ താരം സെർബിയൻ താരത്തിന് കനത്ത മുന്നറിയിപ്പ് തന്നെ നൽകി. എന്നാൽ രണ്ടാം സെറ്റ് ടൈബ്രേക്കറിലൂടെ നേടിയ ജ്യോക്കോവിച്ച് തിരിച്ചു വരവ് ജയം ഒരിക്കൽ കൂടി ആവർത്തിക്കാൻ ഒരുങ്ങി. എന്നാൽ മൂന്നാം സെറ്റിൽ 6-0 ജയം കണ്ട റൂബ്ലേവ് ഒരു ഗെയിം പോലും ലോക ഒന്നാം നമ്പറിന് നൽകിയില്ല. മത്സരത്തിൽ ഒരൊറ്റ തവണ മാത്രം ബ്രൈക്ക് വഴങ്ങിയ റൂബ്ലേവ് 6 തവണയാണ് ജ്യോക്കോവിച്ചിനെ ബ്രൈക്ക് ചെയ്തത്.
