ഗുസ്തിയിൽ ഇന്ത്യയുടെ മെഡൽ പ്രതീക്ഷ നിലനിര്‍ത്തി രവി ദഹിയയും ദീപക് പൂനിയയും. ഇരു താരങ്ങളും തങ്ങളുടെ ക്വാര്‍ട്ടര്‍ ഫൈനൽ മത്സരങ്ങളിൽ വിജയം കുറിച്ചാണ് സെമിയിലേക്ക് കടന്നത്. രവികുമാര്‍ അനായാസ വിജയം നേടിയപ്പോള്‍ ദീപക് പൂനിയ അവസാന നിമിഷത്തിലാണ് വിജയം പിടിച്ചെടുത്തത്.
14-4 എന്ന നിലയിലാണ് ആണ് രവികുമാര്‍ ബള്‍ഗേറിയന്‍ താരത്തെ ആധിപത്യത്തോടെ പരാജയപ്പെടുത്തുകയായിരുന്നു. അതേ സമയം ദീപക് പൂനിയ അവസാന നിമിഷം ആണ് ഒപ്പത്തിനൊപ്പമുള്ള മത്സരത്തിൽ ചൈനീസ് താരത്തെ മറികടന്ന 6-3ന് സെമിയിലെത്തിയത്.
ആദ്യ പിരീഡിൽ ദീപക് 1-0ന് മുന്നിലായിരുന്നു. 3-1ന് മുന്നിലായിരുന്ന ദീപക് 5-1ന്റെ ലീഡ് നേടിയെങ്കിലും ചലഞ്ചിലൂടെ ആ രണ്ട് പോയിന്റ് ചൈന ഇല്ലാതാക്കി. പിന്നീട് ചൈനീസ് താരം 3-3ന് മുന്നിലെത്തി മത്സരം അവസാന 5 സെക്കന്‍ഡിലേക്കെത്തിയപ്പോളാണ് ദീപക് തന്റെ വിജയം കൈപ്പിടിയിലൊതുക്കിയത്.
രവികുമാര്‍ ദഹിയ 57 കിലോ വിഭാഗത്തിലും ദീപക് പൂനിയ 86 കിലോ വിഭാഗത്തിലുമാണ് മത്സരിച്ചത്.
