നിതീഷ് റാണ ഇപ്പോള്‍ കൊല്‍ക്കത്ത നൈറ്റ് റൈഡേഴ്സിന്റെ മധ്യനിരയുടെ കരുത്താണെങ്കിലും താരം ഏവരുടെയും ശ്രദ്ധ പിടിച്ച് പറ്റിയത് ഐപിഎലില്‍ മുംബൈ ഇന്ത്യന്‍സിന് വേണ്ടി കളിയാരംഭിച്ചപ്പോളാണ്. പോണ്ടിംഗ് തനിക്ക് നല്‍കിയ ഉപദേശമാണ് തന്റെ കരിയറില്‍ വഴിത്തിരിവ് ആയതെന്ന് നിതീഷ് റാണ വ്യക്തമാക്കി.
മുംബൈ ഇന്ത്യന്‍സിന് ഏറെ നിര്‍ണ്ണായകമായ ഗുജറാത്ത് ലയണ്‍സിനെതിരെയുള്ള പ്രകടനമാണ് റാണയെ ശ്രദ്ധേയനാക്കിയത്. മത്സരം ടീം പരാജയപ്പെട്ടുവെങ്കിലും 36 പന്തില്‍ നിന്ന് 70 റണ്‍സ് നേടിയ റാണയുടെ പ്രകടനം ഏവരും ശ്രദ്ധിച്ചു. അന്ന് മത്സരത്തിന് മുമ്പ് പോണ്ടിംഗ് നല്‍കിയ ഉപദേശമാണ് തനിക്ക് ആത്മവിശ്വാസം നല്‍കിയതെന്നും റാണ വ്യക്തമാക്കി.
പ്രതിരോധിക്കുവാന്‍ നോക്കേണ്ട, ഷോട്ടുകള്‍ കളിക്കുവാനാണ് തന്നോട് മുന്‍ ഓസ്ട്രേലിയന്‍ ഇതിഹാസ നായകന്‍ റിക്കി പോണ്ടിംഗ് പറഞ്ഞതെന്ന് നിതീഷ് റാണ വ്യക്തമാക്കി. തനിക്ക് പന്ത് അടിച്ച് പറത്തുവാന്‍ കഴിവുണ്ടെന്ന് വിശ്വാസം തനിക്ക് തന്നത് പോണ്ടിംഗ് ആണെന്നും അതിന് ശേഷം തനിക്ക് എന്നും ആ വിശ്വാസം ഉണ്ടായിട്ടുണ്ടെന്നും ഉയര്‍ന്ന നിലവാരത്തില്‍ കളിക്കുവാന്‍ തനിക്ക് ആവും എന്ന ആത്മവിശ്വാസം തനിക്ക് അതിന് ശേഷം എന്നുമുണ്ടെന്നും റാണ വ്യക്തമാക്കി.
