അമേരിക്കയിലെ മെസ്സി മാജിക്ക് തുടരുന്നു. ഇന്ന് മെസ്സി ഇന്റർ മയാമിയെ അവരുടെ ചരിത്രത്തിലെ ആദ്യ കിരീടത്തിലേക്ക് നയിച്ചു. ഇന്ന് ലീഗ്സ് കപ്പ് ഫൈനലിൽ നാഷ്വലിനെ തോൽപ്പിച്ച് ആണ് ഇന്റർ മയാമി കിരീടം നേടിയത്. പെനാൾട്ടി ഷൂട്ടൗട്ടിൽ ആയിരുന്നു മയാമിയുടെ വിജയം. നിശ്ചിത സമയത്ത് ഇരു ടീമുകളും ഒരോ ഗോൾ വീതമായിരുന്നു അടിച്ചിരുന്നത്. മെസ്സി ഇന്നും മയാമിക്ക് ആയി ഗോൾ നേടി. ഷൂട്ടൗട്ടിൽ 11-10നാണ് മയാമി വിജയിച്ചത്.
ഇന്ന് തുടക്കത്തിൽ നാഷ്വലിനെതിരെ ഇന്റർ മയാമിക്ക് കാര്യങ്ങൾ എളുപ്പമായിരുന്നില്ല. കളി നന്നായി തുടങ്ങിയത് നാഷ്വൽ ആയിരുന്നു. ആദ്യ 20 മിനുട്ടുകളിൽ അവർ കളി നിയന്ത്രിച്ചു. 23ആം മിനുട്ടിൽ ലയണൽ മെസ്സിയുടെ ഒരു മാജിക് മൊമന്റ് ഇന്റർ മയാമിക്ക് ജീവൻ നൽകി. മെസ്സിയുടെ ഒരു കേർലർ വലയ്ക്ക് അകത്ത് പതിച്ചു. സ്കോർ 1-0.
മെസ്സി മയാമിയിൽ എത്തിയ ശേഷം തുടർച്ചയായ ഏഴാം മത്സരത്തിൽ ആണ് ഗോൾ നേടുന്നത്. 7 മത്സരങ്ങളിൽ നിന്ന് 10 ഗോളുകൾ മെസ്സി നേടി കഴിഞ്ഞു. ആദ്യ പകുതിയിൽ മയാമി 1-0ന്റെ ലീഡ് നിലനിർത്തി. രണ്ടാ പകുതിയിൽ ആക്രമിച്ചു കളിച്ച നാഷ്വൽ 56ആം മിനുട്ടിൽ സമനില കണ്ടെത്തി. ഒരു കോർണറിൽ നിന്ന് ഫഫ പികോൽറ്റ് ആണ് അവർക്ക് സമനില ഗോൾ നൽകിയത്.
മെസ്സി ഒരിക്കൽ കൂടെ ഇന്റർ മയാമിക്ക് ലീഡ് നൽകുന്നതിന് അടുത്ത് എത്തി എങ്കിലും മെസ്സിയുടെ ഷോട്ട് പോസ്റ്റിൽ തട്ടി മടങ്ങി. ഇരു ടീമുകൾക്കും വിജയ ഗോൾ കണ്ടെത്താൻ ആകാത്തതോടെ കളി പെനാൾട്ടി ഷൂട്ടൗട്ടിലേക്ക് എത്തി. ആദ്യ കിക്ക് എടുത്ത് മെസ്സി അനായാസം ലക്ഷ്യം കണ്ടു.
നാഷ്വലിന്റെ രണ്ടാം കിക്ക് നഷ്ടമായത് തുടക്കത്തിൽ മയാമിക്ക് മുൻതൂക്കം നൽകി. വിജയിക്കാമായിരുന്നു അഞ്ചാം കിക്ക് ഇന്റർ മയാമിയും നഷ്ടമാക്കിയതോടെ സ്കോർ 4-4 എന്നായി. തുടർന്ന് കളി സഡൻ ഡെത്തിലേക്ക് നീങ്ങി. ടീമിലെ 11 താരങ്ങളും പെനാൾട്ടി അടിക്കേണ്ടി വന്നു.ഗ് അവസാനം 11-10 എന്ന സ്കോറിന് മയാമി വിജയിച്ച് കിരീടം ഉയർത്തി.
