പ്രീമിയർ ലീഗിൽ മറ്റൊരു വമ്പൻ ജയവുമായി മാഞ്ചസ്റ്റർ സിറ്റി. ഇന്ന് സ്വന്തം ഗ്രൗണ്ടിൽ സൗതാമ്പ്ടണെ ഏകപക്ഷീയമായ നാല് ഗോളുകൾക്കാണ് മാഞ്ചസ്റ്റർ സിറ്റി പരാജയപ്പെടുത്തിയത്. ജയത്തോടെ ആഴ്‌സണലിനെ മറികടന്ന് പ്രീമിയർ ലീഗിൽ ഒന്നാം സ്ഥാനത്ത് എത്താനും അവർക്കായി. അതെ സമയം സൗതാമ്പ്ടന്റെ തുടർച്ചയായ നാലാം പരാജയമായിരുന്നു ഇത്. ഇതോടെ പരിശീലകനായ റാൾഫ് ഹസൻഹട്ടിന്റെ നില പരുങ്ങലിലായി.
ആദ്യ പകുതിയിൽ ക്യാൻസലോയുടെ ഗോളിലാണ് മാഞ്ചസ്റ്റർ സിറ്റി മത്സരത്തിൽ മുൻപിലെത്തിയത്. തുടർന്ന് ആദ്യ പകുതി അവസാനിക്കുന്നതിന് മുൻപ് ഫിൽ ഫോഡന്റെ മികച്ചൊരു ഗോളിൽ സിറ്റി തങ്ങളുടെ ലീഡ് ഇരട്ടിയാക്കി. രണ്ടാം പകുതിയിലും ആധിപത്യം തുടർന്ന സിറ്റിക്ക് വേണ്ടി റോഡ്രിയുടെ പാസിൽ നിന്ന് റിയാദ് മഹറസ് മാഞ്ചസ്റ്റർ സിറ്റിയുടെ മൂന്നാമത്തെ ഗോളും നേടി. തുടർന്നാണ് മത്സരത്തിന്റെ 65മത്തെ മിനുട്ടിൽ ഹാളണ്ട് സിറ്റിയുടെ നാലാമത്തെ ഗോൾ നേടിയത്. ഈ സീസണിലെ പ്രീമിയർ ലീഗിൽ താരത്തിന്റെ 15മത്തെ ഗോളായിരുന്നു ഇത്.
