ലക്ഷ്യം നിറവേറ്റി ലക്ഷ്യ സെന്‍, കോമൺവെൽത്ത് സ്വര്‍ണ്ണം

കോമൺവെൽത്ത് ഗെയിംസ് പുരുഷ ബാഡ്മിന്റൺ സിംഗിള്‍സിൽ സ്വര്‍ണ്ണം നേടി ഇന്ത്യയുടെ ലക്ഷ്യ സെന്‍. ഇന്ന് മലേഷ്യയുടെ സെ യോംഗ് എന്‍ജിയെയാണ് ലക്ഷ്യ ഫൈനൽ പോരാട്ടത്തിൽ നേരിട്ടത്. 2-1 എന്ന സ്കോറിനായിരുന്നു ലക്ഷ്യ സ്വര്‍ണ്ണ മെഡൽ നേടിയത്.

ആദ്യ ഗെയിമിൽ ലക്ഷ്യയ്ക്ക് കാലിടറിയെങ്കിലും രണ്ടാം ഗെയിമിൽ താരം അതിശക്തമായ തിരിച്ചുവരവ് നടത്തി മത്സരം നിര്‍ണ്ണായകമായ മൂന്നാം ഗെയിമിലേക്ക് നീട്ടി. മൂന്നാം ഗെയിമിൽ 9-5ന് മുന്നിലെത്തിയ ലക്ഷ്യ ബ്രേക്കിന്റെ സമയത്ത് 11-7ന് മുന്നിലായിരുന്നു. ലക്ഷ്യ പിന്നീട് 17-11ന് മുന്നിലെത്തിയെങ്കിലും മലേഷ്യന്‍ താരം ലീഡ് കുറച്ച് കൊണ്ടുവന്ന് സ്കോര്‍ 19-16 എന്ന നിലയിലാക്കി. എന്നാൽ അടുത്ത രണ്ട് പോയിന്റുകള്‍ നേടി സ്വര്‍ണ്ണം ലക്ഷ്യ ഉറപ്പിക്കുകയായിരുന്നു.

 

സ്കോര്‍: 19-21, 21-9, 21-16.