ലോകകപ്പിനിടെ ഹാംസ്ട്രിങിന് പരിക്കേറ്റ ഓസ്ട്രേലിയൻ ബാറ്റ്സ്മാൻ ഉസ്മാൻ ഖവാജ ആഷസ് ആദ്യ ടെസ്റ്റിന് ഉണ്ടാവുമെന്ന് സൂചന നൽകി ഓസ്ട്രേലിയൻ ക്യാപ്റ്റൻ ടിം പെയ്ൻ. ലോകകപ്പിൽ സൗത്ത് ആഫ്രിക്കക്കെതിരെ കളിക്കുമ്പോഴാണ് ഖവാജക്ക് പരിക്കേറ്റത്. തുടർന്ന് താരം ലോകകപ്പിൽ കളിച്ചിരുന്നില്ല. ഓഗസ്റ്റ് 1നാണ് ഇംഗ്ലണ്ടും ഓസ്ട്രേലിയയും തമ്മിലുള്ള ആദ്യ ആഷസ് ടെസ്റ്റ്.
താരം പരിക്കിൽ നിന്ന് മോചിതനായികൊണ്ടിരിക്കുകയാണെന്നും ആഷസ് ടെസ്റ്റിലെ ആദ്യ മത്സരത്തിൽ താരം ഉണ്ടാവുമെന്നും പെയ്ൻ പറഞ്ഞു. കഴിഞ്ഞ നാല് വർഷമായി ഓസ്ട്രേലിയയുടെ നമ്പർ 3 ബാറ്റ്സ്മാൻ ആണ് ഉസ്മാൻ ഖവാജ. പരിക്കിൽ നിന്ന് മോചിതനായി വരുന്ന ഖവാജ കഴിഞ്ഞ ദിവസങ്ങളിൽ നെറ്റ്സിൽ പരിശീലനം നടത്തിയിരുന്നു. അതെ സമയം നാളെ ആരംഭിക്കാനിരിക്കുന്ന ഓസ്ട്രേലിയയുടെ പരിശീലന മത്സരത്തിൽ ഖവാജ പങ്കെടുക്കില്ല.
