ഓസ്ട്രേലിയ 219 റൺസിന് പുറത്ത്, ഇന്ത്യയ്ക്ക് മികച്ച തുടക്കം
മുംബൈയിലെ ഏക ടെസ്റ്റിൽ ഇന്ത്യ മികച്ച നിലയിൽ. മത്സരത്തിന്റെ ഒന്നാം ദിവസം അവസാനിക്കുമ്പോള് ഇന്ത്യ ഓസ്ട്രേലിയയെ 219 റൺസിന് പുറത്താക്കിയ ശേഷം 98/1 എന്ന നിലയിലാണ് തങ്ങളുടെ ഒന്നാം ഇന്നിംഗ്സിൽ. ഓസീസ് സ്കോറിന് 121 റൺസിന് പിന്നിലാണെങ്കിലും വ്യക്തമായ മേൽക്കൈ ഇപ്പോള് മത്സരത്തിൽ ഇന്ത്യയ്ക്കുണ്ട്.
ഷഫാലി വര്മ്മ 40 റൺസ് നേടി പുറത്തായപ്പോള് 43 റൺസുമായി സ്മൃതി മന്ഥാനയാണ് ഇന്ത്യയ്ക്കായി ക്രീസിലുള്ളത്. 4 റൺസ് നേടി സ്നേഹ് റാണയും ആണ് ക്രീസിലുള്ളത്.
രണ്ടാം സെഷന് അവസാനിക്കുമ്പോള് 180/8 എന്ന നിലയിലായിരുന്ന ഓസ്ട്രേലിയ 39 റൺസ് കൂടി ചേര്ക്കുകയായിരുന്നു. 28 റൺസുമായി പുറത്താകാതെ നിന്ന കിം ഗാര്ത് ആണ് ഓസീസിനായി അവസാന നിമിഷ ചെറുത്ത്നില്പുയര്ത്തിയത്. ഇന്ത്യയ്ക്കായി പൂജ വസ്ട്രാക്കര് നാലും സ്നേഹ് റാണ മൂന്നും വിക്കറ്റ് നേടിയപ്പോള് ദീപ്തി ശര്മ്മയ്ക്ക് രണ്ട് വിക്കറ്റ് ലഭിച്ചു. ോ