ഗോകുലം കേരളക്ക് വൻ തിരിച്ചടി, ശ്രീനിധി ഡെക്കാനെതിരെ പരാജയം

Picsart 22 11 27 16 22 00 805

സീസണിലെ ആദ്യ തോൽവി വഴങ്ങി ഗോകുലം കേരള. ശ്രീനിധി ഡെക്കാൻ എതിരില്ലാത്ത ഒരു ഗോളിനാണ് നിലവിലെ ചാംപ്യന്മാരെ കീഴടക്കിയത്. ഡെക്കാൻ അരീനയിൽ നടന്ന മത്സരത്തിൽ അഫ്‌ഗാൻ താരം ഫയ്സൽ ഷായെസ്തേയുടെ ഗോളാണ് ആതിഥേയർക്ക് തുണയായത്. ഇതോടെ അവർ പോയിന്റ് പട്ടികയിൽ ഒന്നാം സ്ഥാനത്തേക്ക് കയറിയപ്പോൾ ഗോകുലം നാലാം സ്ഥാനത്ത് തുടരുകയാണ്.

മത്സരത്തിൽ പലപ്പോഴും താളം കണ്ടെത്താൻ വിഷമിക്കുന്ന ഗോകുലത്തെയാണ് കണ്ടത്. ആദ്യ പകുതി ഗോൾ രഹിതമായിരുന്നു. ഇരു ടീമുകൾക്കും അവസരം തുറന്നെടുക്കാൻ സാധിച്ചെങ്കിലും ആർക്കും ലക്ഷ്യം കാണാൻ ആയില്ല. ആദ്യ പകുതിക്ക് പിരിയുന്നതിന് തൊട്ടു മുൻപ് ആശീർ തൊടുത്തു വിട്ട ഒരു അത്യുഗ്രഹൻ ഷോട്ട് കൈക്കലാക്കി ഷിബിൻരാജ് ഗോകുലത്തിന്റെ രക്ഷക്കെത്തി. അറുപതിമൂന്നാം മിനിറ്റിലാണ് മത്സരത്തിന്റെ വിധി നിർണയിച്ച ഗോൾ എത്തിയത്. ഫയ്സൽ ബോക്സിന് പുറത്തു നിന്നും ഷോട്ട് ഉതിർത്തപ്പോൾ ഇത്തവണ ഗോകുലം പ്രതിരോധത്തിന് മറുപടി ഉണ്ടായിരുന്നില്ല.

Picsart 22 11 27 16 21 42 345

അവസാന നിമിഷങ്ങളിൽ സമനില ഗോളിനായി ഗോകുലം കിണഞ്ഞു ശ്രമിച്ചെങ്കിലും ലക്ഷ്യം കാണാൻ ആയില്ല. സീസണിൽ ആദ്യമായാണ് ഗോകുലം ഗോൾ വഴങ്ങുന്നത്. കൂടുതൽ ഗോളുകൾ കണ്ടെത്തി മുൻനിര ഫോമിലേക്ക് വരേണ്ടത് ടീമിന് അത്യാവശ്യമാണ്. കഴിഞ്ഞ മത്സരങ്ങളിൽ എല്ലാം ഓരോ ഗോൾ വീതമാണ് ഗോകുലം നേടിയിരുന്നത്.