ഞായറാഴ്ച നടക്കുന്ന പ്രീമിയർ ലീഗ് മത്സരത്തിൽ മാഞ്ചസ്റ്റർ യുണൈറ്റഡ് ഫുൾഹാമിനെ നേരിടാൻ ക്രാവൻ കോട്ടേജിലേക്ക് എത്തും. ചരിത്രപരമായി, മാഞ്ചസ്റ്റർ യുണൈറ്റഡിനാണ് ഈ മത്സരങ്ങളിൽ മുൻതൂക്കം. അവസാന 29 മത്സരങ്ങളിൽ 23-ലും അവർ വിജയിച്ചു. കൂടാതെ, ഫുൾഹാമിന്റെ ഗ്രൗണ്ടിൽ നടന്ന അവസാന എട്ട് മത്സരങ്ങളിലും വിജയിക്കാൻ യുണൈറ്റഡിന് കഴിഞ്ഞു.
എന്നാൽ, ഇരു ടീമുകളുടെയും സമീപകാല പ്രകടനങ്ങൾ പരിഗണിക്കുമ്പോൾ, ഇത്തവണ കളിയിലെ ചിത്രം മാറിയേക്കാം. ഇരുടീമുകൾക്കും സീസണിൽ നിർണായകമായ പോയിന്റുകൾ നേടേണ്ടതുണ്ട്.
ആഴ്സണലിനെതിരായ ആദ്യ മത്സരത്തിൽ നല്ല പ്രകടനം കാഴ്ചവെച്ചിട്ടും മാഞ്ചസ്റ്റർ യുണൈറ്റഡിന് ഒരു പോയിന്റും നേടാനായില്ല. ഗോൾകീപ്പർക്കുണ്ടായ പിഴവാണ് അവർക്ക് വിനയായത്. അതിനാൽ, ഈ സീസണിൽ ആദ്യ പോയിന്റുകൾ നേടാനുള്ള സമ്മർദ്ദത്തിലാണ് പരിശീലകൻ റൂബൻ അമോറിം.
പ്രീമിയർ ലീഗിലെ 27 മത്സരങ്ങളിൽ 15 എണ്ണത്തിലും തോറ്റ അദ്ദേഹത്തിന്റെ റെക്കോർഡ് തിരുത്തി തുടങ്ങേണ്ടതുണ്ട്. അതേസമയം, ബ്രൈറ്റണിനെതിരെ റോഡ്രിഗോ മുനിസിലൂടെ അവസാന നിമിഷം സമനില നേടിയ ഫുൾഹാം മികച്ച പ്രകടനം കാഴ്ചവെച്ചിരുന്നു. മാർക്കോ സിൽവയുടെ ടീമിന് ഒരു സജീവമായ ട്രാൻസ്ഫർ വിൻഡോ ഉണ്ടായിരുന്നില്ലെങ്കിലും, അവരുടെ സ്ഥിരതയും ഹോം ഗ്രൗണ്ടിലെ പിന്തുണയും അവരെ അപകടകാരികളാക്കാൻ സാധ്യതയുണ്ട്.
മാഞ്ചസ്റ്റർ യുണൈറ്റഡിന്റെ പുതിയ ആക്രമണനിരയിലുള്ള ബ്രയാൻ എംബ്യൂമോ, ബെഞ്ചമിൻ ഷെസ്കോ, കുഞ്ഞ്യ എന്നിവർ ഈ മത്സരത്തിൽ നിർണായക പങ്ക് വഹിക്കാൻ സാധ്യതയുണ്ട്. ഷെസ്കോ ഇന്ന് ആദ്യ ഇലവനിൽ ഉണ്ടാകും എന്ന് പ്രതീക്ഷിക്കുന്നു.
ഇന്ന് രാത്രി 9 മണിക്ക് നടക്കുന്ന മത്സരം തത്സമയം സ്റ്റാർ സ്പോർട്സിലും ഹോട്സ്റ്റാറിലും കാണാം.
