സിഡ്നിയില്‍ ന്യൂസിലാണ്ടിനെതിരെ ആദ്യ ഏകദിനത്തില്‍ ആദ്യം ബാറ്റ് ചെയ്ത ഓസ്ട്രേലിയയ്ക്ക് 258 റണ്‍സ്. ഓപ്പണര്‍മാരായ ഡേവിഡ് വാര്‍ണറും ആരോണ്‍ ഫിഞ്ചും നല്‍കിയ മികച്ച തുടക്കത്തിന് ശേഷം ഓസ്ട്രേലിയയ്ക്ക് വേണ്ടത്ര രീതിയില്‍ തങ്ങളുടെ ഇന്നിംഗ്സ് മുന്നോട്ട് നയിക്കാനായിരുന്നില്ല. മാര്‍നസ് ലാബൂഷാനെയാണ് മധ്യ നിരയില്‍ ടീമിനായി തിളങ്ങിയത്.
വാര്‍ണര്‍-ഫിഞ്ച് കൂട്ടുകെട്ട് ഒന്നാം വിക്കറ്റില്‍ 124 റണ്‍സാണ് നേടിയത്. വാര്‍ണര്‍ 67 റണ്‍സും ഫിഞ്ച് 60 ണ്‍സുമാണ് നേടിയത്. പിന്നീട് മാര്‍നസ് ലാബൂഷാനെയുടെ ഇന്നിംഗ്സാണ് ഓസ്ട്രേലിയയ്ക്ക് പൊരുതാവുന്ന സ്കോര്‍ നേടിക്കൊടുത്തത്. ലാബൂഷാനെ 56 റണ്‍സ് നേടി.
ന്യൂസിലാണ്ടിനായി ഇഷ് സോധി മൂന്നും മിച്ചല്‍ സാന്റനര്‍, ലോക്കി ഫെര്‍ഗൂസണ്‍ എന്നിവര്‍ രണ്ട് വീതം വിക്കറ്റും നേടി.
