ബെലാറസിന്റെ വനേസ കാലാഡ്സിന്‍സകായയ്ക്കെതിരെയുള്ള 53 കിലോ വിഭാഗം മത്സരത്തിൽ പരാജയം ഏറ്റുവാങ്ങി ഇന്ത്യയുടെ വിനേഷ് ഫോഗട്ട്. ഇന്ന് നടന്ന ആദ്യ മത്സരത്തിൽ ഇന്ത്യന്‍ താരത്തെ പിന്‍ ചെയ്താണ് ബെലാറസ് താരം വിജയം നേടിയത്. 3-9 എന്ന നിലയിൽ ഇന്ത്യ പിന്നിൽ നില്‍ക്കുമ്പോള്‍ ആണ് ബെലാറസ് താരം ഇന്ത്യന്‍ താരത്തെ മലര്‍ത്തിയടിച്ചത്. ഒന്നാം സീഡായിരുന്നു ഇന്ത്യയുടെ വിനേഷ് ഫോഗട്ട്.
ആദ്യ പിരീഡിൽ വിനേഷ് 2-5ന് പിന്നിലായിരുന്നു. രണ്ടാം പിരീഡിൽ മികച്ച പ്രതിരോധം കാഴ്ചവെച്ച ബെലാറസ് താരത്തിനെതിരെ പോയിന്റ് നേടുവാന്‍ ഇന്ത്യ പാടുപെട്ടപ്പോള്‍ 7-2ന് ലീഡ് ബെലാറസ് നേടി. എന്നാൽ അത് ചലഞ്ചിലൂടെ 3-5ന് ഇന്ത്യയ്ക്ക് അനുകൂലമാക്കുവാന്‍ സാധിച്ചുവെങ്കിലും വിനേഷിനെക്കാള്‍ മേല്‍ക്കൈ നേടിയ ബെലാറസ് താരം വീണ്ടും 7-3ന്റെ ലീഡ് നേടി.
തിരിച്ചുവരവിനൊരുങ്ങിയ ഇന്ത്യന്‍ താരത്തെ പിന്‍ ചെയ്ത് ബെലാറസ് താരം വിജയം കുറിച്ചു. ബെലാറസ് താരം ഇനി ഫൈനലിലെത്തിയാൽ വിനേഷിന് റെപ്പാഷെ റൗണ്ടിലേക്ക് യോഗ്യത നേടാനാകും.
