ചെൽസി അവരുടെ പരിശീലകൻ ടൂക്കലിനെ പുറത്താക്കി. ഇന്ന് ഇതു സംബന്ധിച്ച് ഔദ്യോഗിക പ്രഖ്യാപനം വന്നു. തീർത്തും അപ്രതീക്ഷിതമായാണ് ചെൽസി ടൂക്കലിനെ പുറത്താക്കുന്ന വാർത്ത വരുന്നത്. ഇന്നലെ ചാമ്പ്യൻസ് ലീഗിൽ ഡൈനമോ സ്ഗ്രബിനോട് ചെൽസി പരാജയപ്പെട്ടിരുന്നു. ഇതിനു തൊട്ടു പിന്നാലെയാണ് തീരുമാനം.
അവസാന അഞ്ചു മത്സരങ്ങളിൽ മൂന്ന് മത്സരങ്ങളും ചെൽസി പരാജയപ്പെട്ടിരുന്നു. 49കാരനായ ടൂക്കൽ 2021ൽ ആയിരുന്നു ചെൽസിയിൽ എത്തിയത്‌. ആ സീസണിൽ തന്നെ ചാമ്പ്യൻസ് ലീഗ് നേടാൻ അദ്ദേഹത്തിനായിരുന്നു. ചാമ്പ്യൻസ് ലീഗിന് പുറമെ യുവേഫ സൂപ്പർ കപ്പും ക്ലബ് ലോകകപ്പും ചെൽസി ടൂക്കലിന് കീഴിൽ നേടിയിരുന്നു.
ടൂക്കലിന് പകരം ബ്രൈറ്റൺ പരിശീലകനായ ഗ്രഹാം പോട്ടർ ചെൽസിയിലേക്ക് എത്തും എന്നാണ് ഇപ്പോൾ വാർത്തകൾ വരുന്നത്.
