ലോകകപ്പിനായി ഒരുങ്ങുന്ന ബ്രസീൽ ദേശീയ ഫുട്ബോൾ ടീമിന് ഒരു വലിയ വിജയം. ഇന്ന് ടുണീഷ്യയെ നേരിട്ട ബ്രസീൽ ഒന്നിനെതിരെ അഞ്ചു ഗോളുകളുടെ വിജയമാണ് നേടിയത്.
ഇന്ന് ആദ്യ 29 മിനുട്ടുകളിൽ തന്നെ ബ്രസീൽ മൂന്ന് ഗോളുകൾ അടിച്ചിരുന്നു. 11ആം മിനുട്ടിൽ കസമെറോയുടെ ഒരു ലോംഗ് പാസ് ഒരു ഫ്ലിക്ക് ഹെഡറിലൂടെ റഫിഞ്ഞ വലയിൽ എത്തിച്ചു. ഇതായിരുന്നു തുടക്കം. 18ആം മിനുട്ടിൽ ടുണീഷ്യ ഒരു ഫ്രീകിക്കിൽ നിന്ന് താൽബിയിലൂടെ സമനില നേടി.
പക്ഷെ തൊട്ടടുത്ത മിനുട്ടിൽ റഫീഞ്ഞയുടെ പാസിൽ നിന്ന് റിച്ചാർലിസന്റെ ഫിനിഷ് ബ്രസീലിന് ലീഡ് തിരികെ നൽകി. 2-1
29ആം മിനുട്ടിൽ ഒരു പെനാൾട്ടിയിലൂടെ നെയ്മർ ആണ് ബ്രസീലിന്റെ മൂന്നാം ഗോൾ നേടിയത്. ആദ്യ പകുതിയുടെ അവസാനം റിച്ചാർലിസന്റെ അസിസ്റ്റിൻ നിന്ന് റഫീഞ്ഞയുടെ ഒരു പവർ ഫുൾ ഷോട്ട് പോസ്റ്റിൽ തട്ടി വലയിലേക്ക് പതിച്ചതോടെ ആദ്യ പകുതി ബ്രസീൽ 4-1 എന്ന നിലയിൽ അവസനിപ്പിച്ചു. ഇതിനിടയിൽ ടുണീഷ്യ താരം ബ്രോൺ ചുവപ്പ് കാർഡ് കാണുകയും ചെയ്തിരുന്നു.
രണ്ടാം പകുതി ബ്രസീൽ അനായാസം ആണ് കളിച്ചത്. രണ്ടാം പകുതിയിൽ 73ആം മിനുട്ടിലെ പെഡ്രോയുടെ ഗോൾ ബ്രസീലിന്റെ സ്കോർ 5-1 എന്നാക്കി.പിന്നെ വലുതായി അധ്വാനിക്കേണ്ടി വരാതെ ബ്രസീൽ വിജയം ഉറപ്പിച്ചു.
