സ്പാനിഷ് ലാ ലീഗയിൽ പതിനൊന്നാം സ്ഥാനക്കാർ ആയ ജിറോണക്ക് എതിരെ ഗോൾ രഹിത സമനില വഴങ്ങി ബാഴ്‌സലോണ. 10 മത്സരങ്ങൾ ബാക്കിയുള്ളപ്പോൾ രണ്ടാം സ്ഥാനക്കാർ ആയ റയൽ മാഡ്രിഡും ആയുള്ള പോയിന്റ് വ്യത്യാസം 15 ആയി ഉയർത്താനുള്ള മികച്ച അവസരം ആണ് സമനില കാരണം ബാഴ്‌സലോണക്ക് നഷ്ടമായത്. ബാഴ്‌സലോണ ആധിപത്യം ആണ് മത്സരത്തിൽ കാണാൻ ആയത്. എതിർ ഗോൾ കീപ്പറുടെ മികവ് ആണ് പലപ്പോഴും ബാഴ്‌സക്ക് വിലങ്ങുതടിയായത്.
മികച്ച ഒരവസരം ലെവൻഡോവ്സ്കി ബാറിന്റെ മുകളിലൂടെ അടിച്ചപ്പോൾ സ്വന്തം സഹതാരത്തിന്റെ ബാക് പാസ് ഗോൾ ലൈൻ കടക്കാതെ മികച്ച ഫോമിൽ ഉണ്ടായിരുന്ന ജിറോണ ഗോൾ കീപ്പർ ഗസനിക കഷ്ടിച്ച് ആണ് രക്ഷിച്ചത്. ആദ്യ പകുതിയിൽ റഫീനിയ, അറൗഹോ എന്നിവരുടെ ഷോട്ടുകൾ രക്ഷിച്ച ജിറോണ കീപ്പർ മത്സരത്തിന്റെ ഇഞ്ച്വറി സമയത്തെ അവസാന മിനിറ്റിൽ ടോറസിന്റെ കോർണറിൽ നിന്നുള്ള ഗാവിയുടെ ഹെഡർ വളരെ കഷ്ടിച്ച് ആണ് രക്ഷിച്ചത്. സ്വന്തം മൈതാനത്ത് ജയം കാണാൻ ആവാത്ത നിരാശയിൽ ആണ് സാവിയും സംഘവും ഇന്ന് കളം വിട്ടത്. അതേസമയം ലീഗിൽ നേരത്തെ നടന്ന മത്സരത്തിൽ റയോ വല്ലകാനോയെ അത്ലറ്റികോ മാഡ്രിഡ് 2-1 നു തോൽപ്പിച്ചു. ജയത്തോടെ ലീഗിൽ റയലിന് 2 പോയിന്റുകൾ പിറകിൽ മൂന്നാമത് ആണ് അത്ലറ്റികോ.
