സിംഗപ്പൂരിൽ നടന്ന തങ്ങളുടെ രണ്ടാം പ്രീ സീസൺ മത്സരത്തിലും ജയം കണ്ടെത്തി ആഴ്സണൽ. ന്യൂകാസ്റ്റിൽ യുണൈറ്റഡിനെ 3-2 ആണ് ആഴ്സണൽ തോൽപ്പിച്ചത്. മത്സരത്തിന് മുമ്പ് തങ്ങളുടെ പുതിയ സ്ട്രൈക്കർ വിക്ടർ ഗ്യോകെറസിനെ ആഴ്സണൽ സ്റ്റേഡിയത്തിൽ അവതരിപ്പിച്ചിരുന്നു. ഇരു ടീമുകളും പ്രമുഖതാരങ്ങളെ കളത്തിൽ ഇറക്കിയ മത്സരത്തിൽ ആറാം മിനിറ്റിൽ ടൊണാലിയുടെ പാസിൽ നിന്നു പുതുതായി ടീമിൽ എത്തിയ ആന്റണി എലാങ ന്യൂകാസ്റ്റിലിന് മുൻതൂക്കം നൽകി. എന്നാൽ 33 മത്തെ മിനിറ്റിൽ കായ് ഹാവർട്സിന്റെ ബാക്ക് ഹീൽ പാസിൽ നിന്നു ഗോൾ നേടിയ മിഖേൽ മെറീനോ ആഴ്സണലിനെ ഒപ്പം എത്തിച്ചു.
തുടർന്ന് തൊട്ടടുത്ത നിമിഷം വേഗത്തിൽ എടുത്ത ഫ്രീകിക്കിൽ നിന്നു ഹാവർട്സിന്റെ ക്രോസ് തടയാനുള്ള അലക്സ് മർഫിയുടെ ശ്രമം സ്വന്തം പോസ്റ്റിൽ പതിച്ചതോടെ ആഴ്സണൽ മത്സരത്തിൽ മുന്നിൽ എത്തി. രണ്ടാം പകുതിയിൽ ഇരു ടീമുകളും നിരവധി മാറ്റങ്ങൾ വരുത്തി. തുടർന്ന് 58 മത്തെ മിനിറ്റിൽ ലൂയിസ് മൈലിയുടെ പാസിൽ നിന്നു മികച്ച ഷോട്ടിലൂടെ ജേക്കബ് മർഫി ന്യൂകാസ്റ്റിലിനെ ഒപ്പം എത്തിച്ചു. തുടർന്ന് 15 കാരനായ ആഴ്സണൽ യുവതാരം മാക്സ് ഡോൺമാന്റെ മികവിന് ആണ് കാണികൾ സാക്ഷിയായത്. രണ്ടു തവണ ന്യൂകാസ്റ്റിൽ ഗോൾ കീപ്പർമാരെ പരീക്ഷിച്ച ഡോൺമാൻ 84 മത്തെ മിനിറ്റിൽ പെനാൽട്ടിയും നേടി. 15 കാരന്റെ നീക്കം തടയാൻ ജോലിന്റൻ താരത്തെ ഫൗൾ ചെയ്യുക ആയിരുന്നു. തുടർന്ന് പെനാൽട്ടി ലക്ഷ്യം കണ്ട ക്യാപ്റ്റൻ മാർട്ടിൻ ഒഡഗാർഡ് ആഴ്സണലിന് ജയം സമ്മാനിക്കുക ആയിരുന്നു.
