ജാവലിനിൽ ദേശീയറെക്കോർഡ് കുറിച്ച് അനു റാണി ഫൈനലിൽ

ലോക അത്ലറ്റിക് ചാമ്പ്യൻഷിപ്പിൽ ജാവലിൻ ത്രോയിൽ പുതിയ ദേശീയ റെക്കോർഡ് പ്രകടനവുമായി അനു റാണി ഫൈനലിൽ കടന്നു. ഇന്നലെ നടന്ന യോഗ്യത മത്സരത്തിൽ ആണ് അനുവിന്റെ റെക്കോർഡ് പ്രകടനം ഉണ്ടായത്. ഫൈനലിൽ കടക്കാൻ 62 മീറ്റർ താണ്ടണമായിരുന്നു. ഈ അവസരത്തിൽ ആണ് 62.43 മീറ്റർ താണ്ടിയ അനു പുതിയ റെക്കോർഡ് കുറിച്ചത്.

ഇന്നലെ മത്സരത്തിൽ ഉണ്ടായ മറ്റ് ഇന്ത്യൻ താരങ്ങൾ നിരാശരാക്കിയപ്പോൾ അനുവിന്റെ പ്രകടനം മാത്രമാണ് ഇന്ത്യക്ക് ആശ്വസിക്കാൻ ഉള്ളത്. ഇന്നാണ് ജാവലിൻ ഫൈനൽ നടക്കുക. യോഗ്യതയിൽ 67.27 മീറ്റർ എന്ന അവിസ്മരണീയ ദൂരം താണ്ടിയ ചൈനീസ് താരം ഹുയ്ഹുയ് ലയുവിനാണ് ഈ ഇനത്തിൽ സ്വർണം നേടാൻ ഏറ്റവും അധികം സാധ്യത കൽപ്പിക്കുന്നത്.