ഇന്ന് ലോകകപ്പിൽ നടക്കുന്ന വൻ പോരാട്ടത്തിൽ ഇന്ത്യ ചിരവൈരികളായ പാക്കിസ്ഥാനെ നേരിടും. ഗ്രൂപ്പ് ഘട്ടത്തിൽ ഇന്ന് ന്യൂയോർക്കിൽ വച്ച് നടക്കുന്ന മത്സരത്തിലാണ് ഇന്ത്യയും പാകിസ്ഥാനും ഏറ്റുമുട്ടുന്നത്. ഇന്ന് വൈകിട്ട് 8 മണിക്ക് നടക്കുന്ന മത്സരം തൽസമയം സ്റ്റാർ സ്പോർട്സിലും ഹോട്ട് സ്റ്റാറിലും കാണാനാകും.
ഗ്രൂപ്പ് ഘട്ടത്തിലെ ആദ്യ മത്സരത്തിൽ അയർലണ്ടിനെ പരാജയപ്പെടുത്തിക്കൊണ്ട് മികച്ച തുടക്കമാണ് ഇന്ത്യ നേടിയത്. ആ വിജയ പരമ്പര തുടരുകയാകും ഇന്ത്യയുടെ ലക്ഷ്യം. പാകിസ്ഥാൻ ഗ്രൂപ്പ് ഘട്ടത്തിലെ ആദ്യ മത്സരത്തിൽ അമേരിക്കയോട് പരാജയപ്പെട്ടിരുന്നു. ആ പരാജയത്തിൽ നിന്ന് കരകയറുകയാകും പാകിസ്ഥാന്റെ ലക്ഷ്യം. എന്നാൽ ഇന്ത്യക്ക് എതിരെ ലോകകപ്പിൽ അവർക്ക് അത്ര നല്ല റെക്കോർഡ് അല്ല ഉള്ളത്. അതുകൊണ്ട് തന്നെ ഇന്ന് ഒരു വിജയം നേടുക എന്നത് എളുപ്പമായിരിക്കില്ല.
ഇന്ത്യ ആദ്യ മത്സരത്തിലെ അതേ ടീമിനെ തന്നെ നിലനിർത്താനാണ് സാധ്യത. സഞ്ജു സാംസൺ ഇന്നും പുറത്തിരിക്കും എന്നാണ് പ്രതീക്ഷിക്കപ്പെടുന്നത്. മത്സരത്തിന് മഴയുടെ ഭീഷണി ഉണ്ടാവില്ല എന്നാണ് കാലാവസ്ഥാ റിപ്പോർട്ടുകൾ സൂചിപ്പിക്കുന്നത്. പിച്ചിന്റെ മോശം അവസ്ഥ കൊണ്ട് ഇന്നത്തെ മത്സരത്തിൽ ബാറ്റർമാർ ഒരു താളം കണ്ടെത്താൻ പ്രയാസപ്പെടാൻ സാധ്യതയുണ്ട്.
