ആഞ്ചലോ മാത്യൂസ് ടൈംഡ് ഔട്ട് ആയതിന് കാരണം ബംഗ്ലാദേശിന്റെ അപ്പീൽ ആയിരുന്നു. ആ അപ്പീൽ പിന്‍വലിക്കുവാന്‍ ബംഗ്ലാദേശ് നായകന്‍ ഷാക്കിബ് അൽ ഹസന്‍ തയ്യാറായിരുന്നുവെങ്കിൽ താരത്തിന് പുറത്താകൽ ഒഴിവാക്കാമായിരുന്നു. എന്നാൽ താന്‍ ചെയ്തത് ക്രിക്കറ്റ് നിയമങ്ങളിൽ പരാമര്‍ശിച്ചിട്ടുള്ള കാര്യം മാത്രമാണെന്നും അതിനാൽ തന്നെ ശരിയോ തെറ്റോ എന്ന ചര്‍ച്ച നടക്കുന്നുണ്ടെങ്കിലും തന്നെ അത് ബാധിക്കുന്നില്ലെന്നും ബംഗ്ലാദേശ് നായകന്‍ കൂട്ടിചേര്‍ത്തു.
താന്‍ ചെയ്തത് തന്റെ ടീമിനെ വിജയത്തിലേക്ക് നയിക്കുവാനായി നിയമത്തിലുള്ള കാര്യം മാത്രമാണെന്നും ഷാക്കിബ് വ്യക്തമാക്കി. മാത്യൂസ് സ്ട്രൈക്ക് എടുക്കുവാനുള്ള സമയം കഴിഞ്ഞുവെന്നും ഇപ്പോള്‍ അപ്പീൽ ചെയ്താൽ വിക്കറ്റ് ലഭിയ്ക്കുമെന്ന് തന്റെ ടീമംഗമാണ് പറഞ്ഞതെന്നും താന്‍ അപ്പീൽ ചെയ്തപ്പോള്‍ അമ്പയര്‍മാര്‍ താന്‍ അപ്പീലുമായി തുടരുന്നുണ്ടോ എന്നാണ് ചോദിച്ചതെന്നും താന്‍ ശരിയെന്ന് തോന്നിയ നിയമപ്രകാരം ശരിയായ കാര്യമാണ് ചെയ്തതെന്നും ഷാക്കിബ് പറഞ്ഞു.
