ട്രെന്റ് ബ്രിഡ്ജിലെ മഴ മൂലം നഷ്ടമായ മത്സരത്തിന്റെ ഗ്രൗണ്ടിനെ സ്കേറ്റിംഗ് റിംഗിനോടാണ് ഇന്ത്യയുടെ ഫീല്‍ഡിംഗ് കോച്ച് ആര്‍ ശ്രീധര്‍. മഴ മാറി നിന്നുവെങ്കിലും കട്ട് ഓഫ് ടൈമിനു വളരെ മുമ്പ് തന്നെ ഗ്രൗണ്ട് മത്സരയോഗ്യമാകില്ലെന്ന് തീരുമാനിച്ച് മത്സരം ഉപേക്ഷിക്കപ്പെടുകയായിരുന്നു. ഈ ഗ്രൗണ്ടില്‍ മത്സരം നടന്നാല്‍ അത് താരങ്ങള്‍ക്ക് പരിക്ക് പറ്റുവാനുള്ള സാധ്യത കൂടുതലാണെന്നാണ് ഇന്ത്യന്‍ ടീം മാനേജ്മെന്റിന്റെ നിലപാട്, അതിനാല്‍ തന്നെ മത്സരം ഉപേക്ഷിച്ചതാണ് നല്ലതെന്നായിരുന്നു ഇവരുടെ അഭിപ്രായം. അത് തന്നെയാണ് ശ്രീധറും തന്റെ അഭിപ്രായമായി പറഞ്ഞത്.
ഇന്ത്യയുടെ താരങ്ങള്‍ ഗ്രൗണ്ടില്‍ പൊതുവേ ഒരു റണ്‍സ് സേവ് ചെയ്യാനായിട്ട് പരിക്കിനെ വക വയ്ക്കാതെ ഫീല്‍ഡിംഗിനിറങ്ങുന്നവരാണ്, അവരുടെ മനോഭാവം അത്രത്തോളം ടീമാണ് പ്രാധാന്യം എന്നുള്ളതിലേക്ക് എത്തിയിട്ടുണ്ട് എന്നതാണ് ഫീല്‍ഡിംഗ് കോച്ചെന്ന നിലയില്‍ താന്‍ ഏറെ ഇഷ്ടപ്പെടുന്ന കാര്യം. ഇന്ത്യ കുറച്ചേറെ കാലമായി ഫീല്‍ഡിംഗില്‍ മികച്ച ടീമായി മാറി കഴിഞ്ഞിട്ടുണ്ട്.
ക്യാച്ചുകളിലും ഫീല്‍ഡിംഗിലൂടെ റണ്ണൗട്ട് സൃഷ്ടിക്കുന്നതിലും ടീം ഏറെ മുന്നിലെത്തിക്കഴിഞ്ഞുവെന്ന് പറഞ്ഞ ശ്രീധര്‍ ഇനി ടീമിന്റെ ലക്ഷ്യം ഡയറക്ട് ഹിറ്റുകളിലൂടെ കൂടുതല്‍ പുറത്താകലുകള്‍ സൃഷ്ടിക്കുകയാണെന്ന് പറഞ്ഞു. ഇനി മെച്ചപ്പെടേണ്ട ഫീല്‍ഡിംഗിലെ ഒരു ഘടകം അതാണെന്ന് ശ്രീധര്‍ പറഞ്ഞു. കൂടുതല്‍ ഡയറക്ട് ഹിറ്റുകള്‍ സൃഷ്ടിക്കുകയാണ് ഇനിയങ്ങോട്ട് ടീമിന്റെ ലക്ഷ്യമെന്നും അതിനായുള്ള പരിശീലനം കൂടുതലുണ്ടാകുന്നുണ്ടെന്നും ശ്രീധര്‍ വ്യക്തമാക്കി.
അവസരമുണ്ടെങ്കില്‍ ഇപ്പോള്‍ സ്റ്റംപ്സിനെ ലക്ഷ്യം വയ്ക്കുവാനാണ് ടീമിനോട് തങ്ങള്‍ ആവശ്യപ്പെടുന്നത്, കാരണം സഹ താരം ആ പന്തിനെ ബാക്കപ്പ് ചെയ്യുമെന്ന വിശ്വാസം നമുക്കേവര്‍ക്കും ഉണ്ട്, മിക്കപ്പോളും അത് സംഭവിക്കാറുണ്ട്, വളരെ ചുരുക്കം അവസരത്തില്‍ മാത്രമാണ് അവ പിഴയ്ക്കാറ്. അതിനാല്‍ തന്നെ ഇത്തരം അര്‍ദ്ധ അവസരങ്ങളെ മുതലാക്കുവാനാണ് ടീമിനോട് തങ്ങള്‍ ആവശ്യപ്പെടുന്നതെന്നും ശ്രീധര്‍ പറഞ്ഞു.
