ഇന്ത്യയുടെ ലോകകപ്പ് പ്രഖ്യാപനത്തില്‍ ടീമിലെ മൂന്നാം ഓള്‍റൗണ്ടറായി വിജയ് ശങ്കര്‍ പരിഗണിക്കപ്പെട്ടപ്പോളും ഓള്‍റൗണ്ടറുടേതിനെക്കാള്‍ താരത്തിനു ഇന്ത്യ നല്‍കുക നാലാം നമ്പറില്‍ അവസരമാകുമെന്നാണ് പൊതുവേ പ്രതീക്ഷിക്കപ്പെടുന്നത്. അമ്പാട്ടി റായിഡുവിനു പകരം ടീമിലേക്ക് താരത്തെ ഉള്‍പ്പെടുത്തുമ്പോള്‍ ഒരു ബാറ്റിംഗ് ഓള്‍റൗണ്ടറുടെ റോളാവും ടീം വിജയ് ശങ്കറെ ഏല്പിക്കുക.
നാലാം നമ്പറില്‍ ആര് എന്നതായിരുന്നു ഇന്ത്യയുടെ ഏറെക്കാലമായുള്ള ചോദ്യ ചിഹ്നം. അമ്പാട്ടി റായിഡു ഏറെക്കുറെ അത് ഉറപ്പിച്ചുവെന്ന് കരുതിയെങ്കിലും അവസാന കാലത്ത് ഫോം ഔട്ട് ആയതോടെ ടീമിലെ സ്ഥാനം തന്നെ താരത്തിനു നഷ്ടമായി. പിന്നീടുള്ളത് ഇപ്പോള്‍ മികച്ച ഫോമില്‍ കളിയ്ക്കുന്നു കെഎല്‍ രാഹുലിനാണ്, എങ്കിലും വിദേശ് പിച്ചുകളില്‍ താരത്തിനു അത്ര മികവ് പുലര്‍ത്തുവാനാകുമോ എന്ന സംശയം വീണ്ടും ദൗത്യം വിജയ് ശങ്കറിനെ ഏല്പിക്കുന്നതിലേക്ക് ഇന്ത്യയെ എത്തിക്കുമെന്ന് വേണം പ്രതീക്ഷിക്കുവാന്‍.
സണ്‍റൈസേഴ്സ് ഹൈദ്രാബാദിനു വേണ്ടി കെയിന്‍ വില്യംസണ്‍ ഇല്ലാത്തപ്പോള്‍ മൂന്നാം നമ്പറിലും വില്യംസണ്‍ ടീമിലെത്തുമ്പോള്‍ നാലാം നമ്പറിലുമാണ് വിജയ് ശങ്കര്‍ ഇപ്പോള്‍ ബാറ്റ് ചെയ്യുന്നത്. ഇതുവരെ അത്ര ശ്രദ്ധേയമായ പ്രകടനങ്ങള്‍ താരത്തില്‍ നിന്ന് ഐപിഎലില്‍ കാണാനായില്ലെങ്കിലും ഇനിയങ്ങോട്ട് ഈ സെലക്ഷന്‍ നല്‍കുന്ന ആത്മവിശ്വാസം താരത്തിനു വലിയ പ്രഛോദനം ആകുമെന്നാണ് പ്രതീക്ഷിക്കപ്പെടുന്നത്.
